Көннәр аяз, күктән алсу нур сибеп, кояш көлә. Җиргә көмеш тамчы тама, сагынып көтеп алган яз килә.... Яз әле башлана алмаса да, кояш барыбер үзенекен итә, иркәли, җылыта. Күңелләрне кояш иркәләгән, тиздән киләчәк язның назлы җиле бит очларыннан үпкән, шатлыкларга бай, күңелле көннәрнең берсендә – 28 февральдә Уфада "Нур” татар дәүләт театрының зур залында яшьлек, матурлык бәйрәме – "Нәүрүз гүзәле –2014” конкурсы үткәрелде. Яз тамчылары белән сафлык, күңелләргә илһам килгән мизгелдә үткәрелә торган бу бәйрәм ата-бабаларыбыздан килгән. Гореф-гадәтләребезгә тугры калып, быел да республикада уникенче тапкыр "Нәүрүз гүзәле –2014” конкурсы оештырылды. Бирегә халкыбызның бүгенгесе белән киләчәген тоташтыручы, милләтебезнең иң акыллы, сөйкемле, лаеклы кызлары җыелды. Конкурсны Башкортстан татарлары конгрессы, татар хатын-кызларының "Сәхипҗамал” төбәк иҗтимагый оешмасы, "Азатлык” яшьләр берлеге, "Берлек” татар иҗтимагый мәдәни-агарту оешмасы үткәрде. Жюрига "Берлек”нең Башкарма комитеты рәисе Халисә Мөхәммәдиева җитәкчелек итте. Мәртәбәле жюри әгъзалары арасында Башкортстан Республикасы мәдәният министры урынбасары Ранис Алтынбаев та бар иде. Бәйге-тамашага килгән Татарстан Республикасы кунаклары, танылган артистлар, эшлекле даирәләр вәкилләре аның дәрәҗәсен тагын да арттырды.
Просмотров: 950 |
Добавил: bikmiew |
Дата: 18.03.2014
|
