ИГЕНЧЕ

bikmiew — Tue, 09 Dec 2014 10:51:49 GMT

Киләчәккә өмет- ышаныч белән

bikmiew — Mon, 08 Dec 2014 06:21:56 GMT

Президент Мөрәҗәгатьнамәсе – төп программа документы

Русия Федерациясе Президенты Владимир Путин Федераль Җыелышка инде традициягә әверелгән еллык Мөрәҗәгатьнамә белән чыгыш ясады. 4 декабрьдә Кремльнең Георгий залында сәгатьтән артык үткән бу очрашуда сүз илнең эчке һәм тышкы сәясәте, иҗтимагый, икътисадый-социаль үсешенең төп юнәлешләре турында барды. Мөһим үсеш программасы документында, башкарылган эшләр белән беррәттән, киләчәктә ил алдында торган мөһим бурычларга, җәмгыятьне борчыган мәсьәләләргә аеруча зур игътибар бирелде.

Владимир Владимирович үзенең чыгышын ил бердәмлеген ныгытуда ярдәм иткән Русия халкына рәхмәт әйтүдән башлады. 2014 елда илебез тормышында булган мөһим сәяси вакыйга – Кырымның Русия составына кушылуы уңаеннан уй-фикерләре белән уртаклашты. Ярымутрауда урнашкан Кырым Респуб-ликасы һәм аерым статуста булган Севастополь шәһәренең Русиягә яңа субъектлар буларак әйләнеп кайтулары — шул төбәктә яшәүчеләрнең ирекле сайлавы, теләге нәтиҗәсе. Халык референдумда демократия шартларында үзенең киләчәк үсеш юлын бердәм рәвештә билгеләде. Мөрәҗәгатьнамәнең тәүге өлеше күршебез Украинадагы хәл-вакый-галарга бәйле иде. Президент, Русия банклары Украинага барлыгы 33 миллиард доллар күләмендә төрле ярдәм күрсәтүен һәм бүген ике арадагы бәйләнешләрнең никадәр киеренке булуын билгеләп, үзара һәм Европа илләре белән булган мөнәсәбәтләргә бәһа бирде. Мәскәү, Киевта булган корал ярдәмендә дәүләт корылышын үзгәртүне кабул итмәсә дә, Украинаның суве-ренитетын, тугандаш халыкның сайлавын, һичшиксез, хөрмәт итә, диде. Безнең тышкы бәйләнешләр Европа илләре, Америка Кушма Штатлары, шулай ук башка илләр инвесторлары өчен дә һәрвакыт ачык, тимер чаршау төшереп, үз чикләребездә бикләнеп яшәмәячәкбез, төрле яклап хезмәттәшлек дәвам итәчәк. Русия соңгы елларда ныклы үсеш алды, үзаллылык күрсәтте. Безнең илгә төрле елларда зур басым ясалды, ул әле тагын да көчәйде. Хәтта Кырым кушылу сәбәп булып тормаса да, Русиягә карата санкцияләр куллануга башка сә-бәпләре табылыр иде. Русия белән көч позициясеннән торып сөйләшү мәгънәсез. Ракетага каршы оборона буенча үзара килешүнең үтәлмәве, хәрби көчләрнең стратегик балансы бозылуы Европага гына түгел, ә бөтен дөньяга куркыныч белән яный. Без бик тә кыйммәткә төшүче кызу коралланырга җыенмыйбыз, әмма илебезнең оборона куәтен ныгытачакбыз. Без көчлебез һәм үзебезгә ышанабыз, дип билгеләде Владимир Путин халыкара иминлек мәсьәләләренә кагылып.

Президент шулай ук илдә югары квалификацияле эшче кадрлар, белгечләр, фәнни хезмәткәрләр әзерләү, сәламәтлекне саклау, мәгариф үсеше, социаль өлкәдә хәл ителәсе проблемаларны да атады, аларны гамәлгә ашыру юлларын күрсәтте. Медицина страховкасы, салым салу буенча, эшкуарлыкны, кече һәм уртача бизнесны (хәзерге шартларда аның әһәмияте нык арта) үстерүгә комачаулаучы административ барьерларны киметү, талантлы балаларны, яшьләрне матди дәртләндерү өлкәсендә әйткән тәкъдимнәрне дә залда утыручылар бердәм хуплап каршы алдылар. Мәсәлән, ана капиталы программасы киләсе елда да дәвам иттереләчәк, диде. Ә Кырым халкына бу матди ярдәм 2007 елдан соң ике һәм аннан да күбрәк бала туган гаиләләргә дә биреләчәк.

Ә икътисад һәм башка өлкәләрдә хезмәттәшлек итәрдәй илләр күп дөньяда. Европа Союзы альянсы санкцияләренә карамастан, Русиянең Азия һәм Тын океан төбәге илләре белән үзара хезмәттәшлеге ныгый баруы – шуның ачык мисалы. Евразия икътисадый союзы киләсе ел башыннан үзенең эшчәнлеген башлаячак. Ул Русия өчен дә, союз составындагы башка илләр өчен дә куәтле үсеш чыганагы булып торачак.

Мөрәҗәгатьнамәдә илнең эчке эшләренә, аеруча кече бизнес үсеше, яңа технологияләр кертү, җитештерүчәнлекне арттыру, чыгымнарны, инфляцияне киметү проблемаларына да шактый зур урын бирелгән иде. Президент 2012 елның маенда кабул ителгән Указлар үтәлешен дә читләтеп үтмәде. Алар, мәгълүм булуынча, тормышыбызның төрле өлкәләренә кагыла. Санкцияләр – үзебезнең илебез эчендә икътисадны җитез темплар белән үстерүгә, эчке мөмкинлекләрне тулырак ачарга стимул, дип ассызыклады Президент. Безнең ил халкы — эшчән, акыллы һәм талантлы. Иң мөһиме – хәзер кешеләргә үз-үзен ачарга, мөмкинлекләрен, сәләтен һәм талантын үстерүгә юл ачарга, һәртөрле чикләүләрне бетерергә кирәк. Һәр кеше үзенең эш урынында гражданлык активлыгы, ватанпәрвәрлык күрсәтеп, намус белән, тырышып эшли, зур уңышларга ирешә икән, санкцияләргә каршы бездән җавап шул булачак. Ватаныбыз үсеше, имин тормыш хакына барыбыз да бергә тупланырга вакыт җитте. Ә инде җинаятьчел җавапсызлык күрсәтү, бюджет исәбенә баю, коррупция күренешләре илебезнең иминлеген тәэмин итүгә турыдан-туры куркыныч янау булып тора. Без төрле хокук бозуларга каршы ныклы көрәш алып барырга тиешбез. Бюджетның һәр сумын максатлы тотынырга, нәтиҗәле файдаланырга бурычлыбыз.

Чит илләрдән кертелеп килгән товар-ларны үзебезнекенә алыштыру, аларны бездә җитештерүне тизрәк җайга салу – озак вакыт таләп иткән эш. Ләкин моны кичекмәстән башларга кирәк! Безнең илдә җитештерелгән товарлар дөнья күләмендә көндәшлек сәләтенә ия булырга тиеш. Аерым алганда, читтән сатып алынган дару-препаратларның шактый өлешен 3 ел эчендә үзебездә җитештерә башлау бурычы куела.

В.Путин намуслы, фидакарь хез-мәтләре белән Русиянең икътисадый куәтен ныгытуга зур өлеш керткән ва-тандашларына ихлас рәхмәт сүзләрен җиткерде. Андый рәхмәтне илебезнең азык-төлек иминлеген тәэмин итүче эшсөяр авыл хуҗалыгы хезмәткәрләренә һәм быел кыш Сочида үткәрелгән Олимпия һәм Паралимпия уеннарында югары нәтиҗәләргә ирешкән данлы спортчыларга да әйтте. Демография хәлләренә дә тукталды, бу юнәлештә уңай үзгәрешләр күзәтелүен билгеләп үтте. Соңгы ике елда илебездә халык саны сизелерлек арткан. 2013 елда 136 миллион кеше яшәсә, быел алар 146 миллионга җитәчәк, дип фаразлана. Ха-лыкның уртача яшәү дәвамы хәзер 71 яшькә җитте – биредә дә үсеш шактый. Якын елларда аны 74 яшькә кадәр күтәрү максаты тора. Демография өлкәсендә үткәрелгән сәясәт үзенең нәтиҗәле булуын күрсәтте. Ил башлыгының 2015 елны йөрәк-кан тамырлары авыруларына каршы көрәш елы дип игълан итәргә тәкъдим итүе дә хуплауга лаек.

Шушы һәм очрашуда күтәрелгән башка мөһим мәсьәләләрне эзмә-эзлекле хәл итү 2015 елда һәм алдагы елларда илебезнең тотрыклы, алгарышлы үсешен тәэмин итүгә, Русиянең дөнья күләмендә үзаллы, бәйсез, куәтле держава, нык үсеш алган гражданлык җәмгыяте булып әверелүенә булышлык итәчәк. Президентыбызның ил мәнфәгатьләрен яклап ныклы позициядә торуы, сәяси яктан төпле һәм уйланылган чыгышы, киләчәккә анык эш программасы белән Русия халкына турыдан-туры мөрәҗәгать итүе моңа өмет-ышанычны тагын да арттыра.

Рәшит Вахитов.

Техниканың әзерлеге – беренче планда!

bikmiew — Thu, 04 Dec 2014 09:15:59 GMT

Район семинар-киңәшмәсеннән

Агымдагы елның 10 ноябрендә муниципаль район хакимияте “Авыл хуҗалыгы техникасын 2015 елгы басу эшләренә әзерләү турында” карар кабул иткән иде. Анда авыл хуҗалыгы техникасын киләсе елгы басу эшләренә әзерләүне тәмамлау сроклары билгеләнде. Атап әйткәндә, туфрак эшкәртү һәм чәчү агрегатларын –15 мартка, тракторларны һәм аларның тагылмаларын, шулай ук минераль ашлама сиптергечләрне һәм тараткычларны – 1 апрельгә, мал азыгы хәзерләү комбайннарын, тагылма ургычларны һәм печән хәзерләү техникасын – 25 майга, ашлык комбайннарын, ургычларны һәм бөртек чистарту корылмаларын – 10 июньгә, бөртекне җыеп алганнан соң эшкәртү машиналарын һәм җиһазларын – 10 июльгә, автомобиль үлчәүгечләрне – 1 июльгә, шикәр чөгендере җыю техникасын 1 сентябрьгә әзерләп бетерү бурычы куелды.

Хуҗалыклар җитәкчеләренә, белгечләргә һәм крәстиян-фермер хуҗалыклары башлыкларына авыл хуҗалыгы техни-касын дефектовка үткәргәннән соң норматив таләпләргә ярашлы озайлы саклауга куярга тәкъдим ителде. Шушы максатта ремонт бригадалары һәм звенолар төзү, басу эшләренә әзерләнү буенча хезмәт коллективлары, аерым ремонтчылар арасында ярыш оештыру, үзйөрешле техниканы һәм аларның тагылмаларын дәүләт техник каравына үзвакытында кую буенча тәгаен бурычлар билгеләнгән иде.

2015 елда басу эшләрендә катнашачак барлык төрдәге авыл хуҗалыгы тех-никасын үзвакытында һәм яхшы сыйфатлы итеп әзерләү максатында 3 декабрьдә җаваплылыгы чикләнгән “Юлдаш” җәмгыятендә район семинар-киңәшмәсе үткәрелде. Аның эшендә хуҗалыклар җитәкчеләре, баш инженерлары һәм аграномнары, бригадирның техника буенча ярдәмчеләре, муниципаль район хакимиятенең авыл хуҗалыгы бүлеге белгечләре, дәүләт техник күзәтчелеге инспекциясе вәкилләре катнашты.

Тәүдә семинарда катнашучылар Көсәкәй машина-трактор остаханәсе ихатасында һәм гаражларда кышкы саклауга куелган авыл хуҗалыгы техникасын, туфрак эшкәртүдә кулланыла торган тагылма инвентарьны, башка механизм һәм узелларны карадылар, мастерскойларда булып, ремонт барышы белән таныштылар. Җәмгыятьнең баш инженеры Илшат Әгъләм улы Хәбиров авыл хуҗалыгы машиналарын кышкы саклауга кую һәм ремонт эшләре турында сөйләде. Биредә шуны да әйтергә кирәк: хуҗалыкта барлык төр авыл хуҗалыгы машиналары да көзге кыр эшләре тәмамлану белән дәүләт стандарты таләпләренә җавап бирерлек итеп кышкы саклауга куелган, тагылма инвентарь язгы кыр эшләренә әзерләнә, техниканың ышанычлы сакланышын тәэмин итү буенча тиешле чаралар күрелә.

Машина-трактор остаханәсендә булганнан соң семинарда катнашучылар сөтчелек фермасына бардылар. Биредә савым сыерлары асралган бинага үз көчләре белән реконструкция үткәргәннәр. Яңа сөт саву линиясе урнаштырылган, суүткәргеч тә яңарган. Абзар эче якты, түбәсен заманча итеп япканнар, аннан яктылык көнозын эчкә төшеп тора. Кыскасы, фермада терлекчеләр өчен эш шартлары сизелерлек яхшырган.

Семинар-киңәшмәнең теоретик өлеше Көсәкәй авылы мәдәният йортында дәвам итте. Тәүдә җаваплылыгы чик-ләнгән “Юлдаш” җәмгыяте рәисе Ранис Рәис улы Хәмәтдинов хуҗалык эшчәнлеге, игенчелек һәм терлекчелек тармакларында кайбер икътисадый күрсәткечләр белән таныштырды, техниканы кышкы саклауга кую һәм ремонтлау буенча башкарылган эшләргә тукталды. Аннары дәүләт техник күзәтчелеге инспекциясе начальнигы Илнур Әнгам улы Хәкимов чыгыш ясады. Авыл хуҗалыгы бүлегенең баш инженеры Фидрат Шәгали улы Әхмәтов, хезмәтне саклау буенча белгеч Рәсим Рим улы Хаков авыл хуҗалыгы предприятиеләрендә техника паркын яңарту, киләсе елгы басу эшләренә әзерләү, хезмәтне саклау, производствода хәвефсезлек кагыйдәләрен үтәү буенча күрелгән чаралар, кешеләрнең иминлеген тәэмин итү өлкәсендәге бурычлар турында сөйләделәр. Авыл хуҗалыгы бүлеге начальнигы Алмаз Венер улы Камаловның көнүзәк мәсьәләләргә кагылышлы чыгышын да очрашуда катнашучылар зур игътибар белән тыңладылар.

Семинар-киңәшмәгә муниципаль район хакимияте башлыгының беренче урынбасары Ригат Хаҗиев йомгак ясады, очрашуда әйткәннәрдән чыгып, тәгаен бурычлар куйды. Ә район алдында торган бурычлар, чыннан да, бик зур. Киләсе елда да игенчелек һәм терлекчелек өлкәләрендә ирешелгәннәрне ныгыта барып, тотрыклы һәм алгарышлы үсешне тәэмин итергә кирәк. Техника паркын заман техникасы белән даими яңартып тору, аларны яхшы итеп хез-мәтләндерү һәм саклау, авыл хуҗалыгы машиналарына ремонт эшләрен үзвакытында һәм сыйфатлы итеп башкару, механизаторларның квалификациясен даими күтәрү, алмаш кадрлар әзерләүгә җитди игътибар бирү – уңышка ирешүнең нигезен тәшкил итүче төп факторлар. Киләсе елның җәендә безнең районда үтәчәк республика әһәмиятендәге чарага – басу көненә ныклап әзерләнү бурычы тора. Авыл хуҗалыгы техникасын 2015 елгы басу эшләренә әзерләүне ныклы контрольдә тоту максатында Башкортстан Авыл хуҗалыгы министрлыгында һәм районнарда махсус штаб оештырылачак. Андый штаб безнең районда да булдырыла.

Ригат Нурый улы үзенең чыгышында барлык төр техниканы муниципаль район хакимияте карарында билгеләнгән вакытка әзерләп бетерү, язгы кыр эшләренә яхшы әзерлек белән килү, кыйммәтле техниканы, авыл хуҗалыгы машиналарын кадерләп-саклап тоту, җитештерүчәнле файдалану, киләсе елда да югары нәтиҗәләргә ирешү буенча уй-фикерләрен җиткерде, киңәшләр бирде.

Рәшит Вахитов.

Сокланырлык эшләр күрдек

bikmiew — Tue, 02 Dec 2014 04:38:31 GMT

Канададагы эшчәнлек алымнарын бездә дә кулланып була, ди “Герой” кооперативы рәисе Фәргать Ваһапов

Авыл хуҗалыгы җитештерүендә ирешелгәннәр — беренче чиратта гомум тырышлык, хезмәтне фәнни нигездә, максатлы оештыруның нәтиҗәсе. Тик заман алга барган саен үз казаныңда гына кайнау җитми, хәтта илебездәге казанышларны өйрәнү-куллану гына да аз тоела башлый. Дөрес, чит илләр тәҗрибәсен өйрәнү, аларның белгечләре белән бәйләнеш булдыру байтактан яшәп килә. Хәтерегездәдер, районда Голландия, Германия белгечләре катнашлыгында Бөтенрусия семинарлары узды, алдынгы тәҗрибәләр өйрәнелде, кулланыла башлады, җитештерү юлларын киңәйтте. Ясалма орлыкландыру эшчәнлегендә дә үрнәк булырлык эшләр бар. Районыбыз эшчәннәре башкарганнар хөкүмәтебез җитәкчелеге тарафыннан башкаларга үрнәк итеп куела бүген. Фәкать Чакмагыш җирлегенә республиканың күп районнарыннан эшкә өйрәнергә, тәҗрибә уртаклашырга киләләр. Чакмагыш инде алдынгы тәҗрибә мәктәбенә әверелде. Әмма ирешелгәннәр чик түгел, заман авыл кешесе алдына яңа таләпләр куя. Ә камиллеккә омтылыш – чакмагышлыларның яшәү девизы. Күптән түгел, дистәләгән белгеч, хуҗалыклар җитәкчеләре Канадада булып, терлекчелекне үстерү буенча алдынгы технологияләр белән танышып, укып-өйрәнеп кайтты. Бу җәһәттән “Герой” кооперативы рәисе, Башкортстан Республикасының атказанган авыл хуҗалыгы хезмәткәре Фәргать Ваһапов белән әңгәмәләштек. Ул түбәндәгеләрне бәян итте.

—Барлык күрелгән-ишетелгәнне видеога төшереп-яздырып кайттым. Сыер малларын асрау, аеруча бозаулар үстерү алымнары ошады.

Мәсәлән, безнең 40 кеше баш-карганны биредә 5 кеше аткара. Бер фермада сыер саву системасын күреп сокландык. Цехта хезмәтләндерүче кешеләр юк. 350 сыерны 6 робот сава. Моның өчен 1 миллион доллар акча тотынылган. Ә бит мондый корыл-маларны бездә дә урнаштырырга мөмкин. Янә бер ясалма орлыкландыру операторы 3600 баш терлекне хезмәтләндерә. Эшләре күп, әлбәттә. Әмма җайга салсаң, болай да эшләп була икән. Терлекләрне тукландыру системасын өйрәнеп, көйләп җибәрү дә мөмкин булмастай эш түгел. Мал азыгын хәзерләү технологиясе нык уйланылган. Сенаж, силос салу тәүге карашка бездәге кебек, тик сыйфатка омтылыш күпкә артык.

Яшел масса полиэтилен материал өстенә салына, тыгызлангач, витаминлы катнашмалар өстәлә дә һәр сыерга каплап-төреп куялар. Нинди генә азык өстәмәләре юк анда: малга һәммәсен кушып, бутап ашаталар. Нәтиҗәсе дә күзгә күренеп тора: көн саен һәр сыердан 40 литрдан күбрәк сөт савалар, елына 12 мең тонна тирәсе продукция җитештерәләр. Биналарда микроклимат яхшы.

Ә менә бозау үстерүгә сөтне күп кулланмыйлар, бәлки туганнан соң 1 тапкыр угыз эчерү белән чикләнәләр, аннан соң ясалма сөт бирә башлыйлар. Тагын шунысы игътибарны җәлеп итте: ит терлекчелеге ныклы үсештә. 4 центнерлы үгезне сатып алалар да, 8 центнерга җиткереп саталар. Тәүлеклек күркәләрне алып, 8-10 килограммга кадәр үстерәләр, аталары хәтта 16шар килограммга җитә. Шәп бит! Терлек асралган биналардагы чисталыкка, әйләнә-тирәдәге пөхтәлеккә сокланмый мөмкин түгел. Һәркайда асфальт җәелгән. Кукуруз культурасын ферма биләмәсенә бик якын чәчәләр, яшел массасын җыеп силоска салу мәшәкатьләрен-чыгымнарын да байтакка киметәләр икән.

Билгеле булуынча, бу илдә фермерлык хәрәкәте чәчкә аткан. Әмма алар аерым гына күпкә ирешә дә алмаслар иде, мөгаен. Шуңа да, берләшеп, кооперативлар оештыралар. Без барган җирдә 42 фермер берләшкән иде. Продукцияне күпләп җитештерү, сату мәсьәләләре, гомумән, барча эшчәнлек киңәшләшеп-планлаштырып, бергәләп хәл итүгә көйләнгән. Фермерларга ярдәм күрсәтелми, ә менә 1 процентлы гына кредит бирелүе — уңай күренеш.

Фермерлар гаиләсендә ун яшьлек кенә балалар да эш белән мәшгуль. Көч ташлаган, өлкәнәйгән фермер мөлкәтен улы яки кызына бушка калдырмый, бүләк итми, ә бәлки сатып бирә. Гаҗәп күренеш, әлбәттә.

Кыскасы, фәһем алырдай үрнәкләрне күп күрдек без, тырышканда, зиһенне эшкә җиккәндә, һичшиксез, байтагын кулланып була һәм якын киләчәктә шулай эшләнәчәк тә. Фәргать Фәрит улы чит илгә сәяхәтеннән бик канәгать калган, һәммәсен энәсеннән җебенә кадәр дигәндәй күңеленә салып куйган. Уйлаганын аткармас, дип кем әйтер. Кооператив ирешкән казанышлар күз алдында ич. Игенчелек тә, терлекчелек тә бердәй үсештә. “500 ферма” республика программасы да гамәлгә кертелде, Каранда бүген бу җәһәттән бик уңышлы эшлиләр. Ит-сөт, ашлык елдан-ел мулрак җитештерелә, мәсәлән. Башка елларга караганда складлар санын да арттырганнар, әмма ашлыклары һаман сыймаган.

Әйткәндәй, төзелеш, ремонт эшләре биредә көннән-көн киңрәк колач ала бара. Соңгы елларда гына заманча 18 бина калыкты — болар башлыча складлар, ашлык, печән саклагычлар, гаражлар һәм башка хуҗалык карамагындагы объектлар. Эшләр өчен дә уңайлы, техниканы түбә астына кую да отышлы. Аеруча яңа, кыйммәтле техниканы сакларга кирәк. Ә бу хуҗалыкта техника елдан-ел арта бара. 2013 елда 81 миллион 300 мең сумлык техника яңартылды, быел тагын 38 миллион 230 меңлек сатып алынды.

Шартлар булгач, кешеләр дә эшкә килергә ашкынып тора. Хуҗалыкның икътисады ныгыган саен авыл йөзе үзгәрә, халкы бай һәм мулрак тормышта яши.

Әңгәмәдәш — Рәзифә Сәхапова.

Олысына да, кечесенә дә әни – иң кирәк кеше

bikmiew — Mon, 01 Dec 2014 04:26:25 GMT

Билгеле булуынча, көз аеның соңгы якшәмбесендә якты һәм зур бәйрәм – Әниләр көне билгеләп үтелә. Һәркайсыбыз өчен дә җир йөзендә иң кадерлесе булган шушы гүзәл затларга – әниләргә, нәнәйләр-дәү әниләр, картәниләргә багышлап район мәдәният йортында быел да эчтәлекле программалы концерт әзерләнгән иде.

“Әнкәйләргә рәхмәт әйтик” дип исемләнгән бу тантаналы тамаша ихлас котлау-теләкләргә, җыр-моңга бай булды. Гүзәл Табишева башкаруындагы моңлы җыр белән башланып киткән тамашаны ачып, аны алып баручылар Хәтиф Хәбибрахманов һәм Розалия Хафизова залда утыручы барлык гүзәл затларны тәбрикләү өчен сәхнәгә муниципаль район хакимияте башлыгы урынбасары Геннадий Фотеевич Крюковны чакырды. “Без шушы көннәрдә иң гүзәл һәм якты бәйрәмне билгелибез, аңа беркем дә битараф кала алмый торгандыр. Чөнки җир йөзендә әнидән дә якынрак кеше юк. Шушы уңайдан ихлас котлауларны кабул итегез. Гомумән, ел дәвамында хатын-кызларны тәбрикләүгә багышланган бәйрәмнәрне ике тапкыр – 8 март һәм Әниләр көнендә билгеләү аеруча шатлыклы. Чөнки нәкъ менә алар – яшәешнең чыганагы. Бүген безнең район җирлегендә балигълык яшенә җитмәгән 6500 баланы тәрбияләүче ике мең ярым гаилә яши. Шулардан 500е – күп балалылар. Мондый гаиләләрнең артуы сөенечле. Районда демографик хәлне яхшырту максатында күп төрле чаралар гамәлгә ашырыла. Аларның куанычлы нәтиҗәсе саннарда да чагыла. Быел ел башыннан безнең районда 370 сабый дөньяга килде, бу былтыргы күрсәткечтән 33кә күбрәк. Җирлегебездә биш һәм аннан артыграк бала тәрбияләүче “Ана даны” медаленә ия булган 62 әни бар, аларның алтысына бу медаль агымдагы елда тапшырылды. Районыбызда яшәүче хатын-кызлар җәмәгать тормышының барлык өл-кәләрендә дә уңышлы эшчәнлек алып бара, хөрмәтле өлкәннәребез өченче буын халык университетлары программасында актив катнаша. Әниләр, хатын-кызлар инициативасы белән район авыллары “Аек авыл” акциясенә кушылды. Аларның тырышлыгы белән тормышыбыз якты, матур. Хөрмәтле гүзәл затлар, яшәешебезне ямьләүгә, җәмгыятьне яхшыртуга юнәлтелгән тырышлыгыгыз уң булсын, балаларыгыз-оныкларыгыз сезнең горурлыгыгыз, шатлыгыгыз булсын”, – дип тәбрикләде Геннадий Фотеевич һәм залда утыручы ике гүзәл затка – Чакмагыш гимназиясенең тарих укытучысы Ләйсән Илһам кызы Кинҗәкәева һәм Аблай урта мәктәбенең татар теле һәм әдәбияты укытучысы Рузилә Үзбәк кызы Әхмәтовага муниципаль районның Рәхмәт хатларын һәм “Бердәм Русия” партиясенең районыбыздагы бүлегенең бәйрәм бүләкләрен тапшырды. Аңардан соң чыгыш ясаган район хатын-кызлар советы рәисе Эльвира Әхәт кызы Газизова үзе җитәкчелек иткән советның эшчәнлеге белән таныштырды һәм оешма эшчәнлегенә аеруча зур өлеш керткән балигъ булмаганнар эше һәм аларның хокукларын яклау буенча комиссия белгечләре Мәмдүдә Рәхмәй кызы Вәлиуллина һәм Гөлдәр Тимерҗан кызы Имангуловага Баш-кортстан Республикасы Хатын-кызлар Союзының Рәхмәт хатларын һәм “Бердәм Русия” партиясе бүләкләрен тапшырды. Балалар сәнгать мәктәбенең хореография бүлегендә шөгыльләнүче яшь биючеләрнең һәм Илвир Сәетгәрәевның дәртле биюләре, Фәния Шәрипова, Эльмира Сәлахова, Мөнирә Сабитова, Гүзәл Табишева, Илназ Миңнеханов, Розалия һәм Радик Гафаровларның җырлары, Руслан Сәлаховның курай моңнары залда утыручы барлык аналар, картәни-нәнәйләр өчен матур бәйрәм бүләге булды.

Рәзилә Арсланова.

Өлгереп кал һәм… бүләк тә от!

bikmiew — Thu, 27 Nov 2014 09:11:31 GMT

Матбугат – 2015

Хөрмәтле абунәче дусларыбыз!

Вакытлы матбугат басмаларына 2015 елның беренче яртысына язылу вакыты тәмамлануга бара. Елдагыча, декабрьнең 25ендә “Игенче” һәм “Сакмагош саткылары” гәзитләренә язылу да туктатылачак, ягъни бу көннән соң язылучыларга гәзитләр 1 гыйнвардан түгел, ә соңрак (кайчан язылуга карап) – язылганнан соңгы айның беренче көненнән генә килә башлаячак. Яңа елны иң якын дуслар белән каршылау гадәте бездә ныклы, ә менә шундый дәрәҗәдәге район гәзите янәшәгездә булмаса, бәйрәмнәрегез, һичшиксез, барыбер китегрәк тоелачак инде.

Без сезнең һәммәгезне дә әнә шундый хәлләрдән саклап калырга теләп мөрәҗәгать итәбез: әйдәгез, инде тагын да сузмыйча, почтальоннарга биргән вәгъдәләрне үтәп куйыйк әле! Элемтә бүлекчәләрендә, почтальоннарда, почтамтта 2015 елның гыйнвар – июнь айларына “Игенче”нең бер данәсенә язылу хакы 658 сум 92 тиен, “Сакмагош саткылары”на – 130 сум 38 тиен (Әйткәндәй, безнең район гәзитләренә язылу хакы төбәгебездә нәшер ителүче башка районнардагыдан күпкә арзанрак та әле). Авыллардагы элемтә бүлекчәләрендә хезмәт салучы кызларга бирелгән вәгъдәләрне (“фәлән көнне хезмәт хакы, пенсия, пособие (һәм башкалар) алам”, “фәлән вакытка мал суеп тапшырам” һәм башкалар) Яңа елга кадәр үтәп куйсагыз иде, чөнки үтәлмәгән вәгъдәләрнең ел буе күңелегезне кырып торуы бар бит. Ышаныгыз, район гәзитләре киләсе елларда да сезне иң дөрес мәгълүматлар, өр-яңа хәбәрләр, яңалыклар белән дә, укымлы һәм фәһемле мәкаләләр белән дә һәм, әлбәттә, икътисадны алга этәрүче реклама белән дә таныштырып баруны дәвам итәчәк.

Район үзәгендә яшәүчеләргә редак-циянең үз почтальоннары отышлы юл тәкъдим итә: шул ук алты айга бездә язылу 475 сум (“Игенче” гәзитенә), 108 сум (“Сакмагош саткыларына”) тора. Өстәвенә, 950 сумга “Игенче”гә еллык язылу-чылар арасында Абунәчеләр лотереясе дә булачак. Отышлар арасында, елдагыча, сыер маллары, тере әтәчләр, шикәр комы, иген фуражы, ак он һәм башкалар, шулай ук көнкүрештә куллану әйберләренең киң ассортименты булачак. Былтыр, мәсәлән, өч шундый абунәчебез иң зур бүләкләрне – тере бозаулар алды.

Әйткәндәй, авылларда яшәүчеләр дә лотерея отышында катнаша ала. Бу очракта редакциягә үзегезгә килеп язылырга туры киләчәк һәм почта чыгымнары белән еллык подписка 1200 сум тәшкил итәчәк. Авыллардагы элемтә бүлекчәләре еллык язылу кабул итми, ләкин бездә яздырылганны өйләрегезгә вакытында китереп торачак.

Әйдәгез әле, һәркайсыбыз Яңа елда да иске дуслар белән бергә калыйк һәм, бәхет елмайса (!), өстәмә бүләккә дә ия булыйк! Сезнең активлыгыгызны көтәбез, дуслар!

Мөхәрририят.

Илне данлап, җирне ямьләп яшә, хөрмәтле, уңган авыл эшчәне!

bikmiew — Thu, 27 Nov 2014 09:06:56 GMT

Чакмагышның икмәген

Кемнәр генә икмәде?!

Икмәк игеп, кемнәр генә

Данлы юллар үтмәде?!

Игенче һөнәрен зурлап

Иң-иң түргә куярлык.

Игенчегә саф алтыннан

Сынташ – һәйкәл куярлык.

21 ноябрьдә Авыл хуҗалыгы һәм эшкәртү сәнәгате хезмәткәрләре көне үткәрелде. Район мәдәният йортына – бәйрәм тантанасына хезмәт алдынгылары – игенчеләр, терлекчеләр, белгечләр, крәстиян-фермер хуҗалыклары җитәк-челәре, күмәк хуҗалыклар рәисләре, авыл Советы авыл биләмәләре башлыклары, эшкәртү сәнәгате предприятиеләре һәм оешмалары хезмәткәрләре, хаклы ялдагы хезмәт ветераннары җыелды.

Тантанага чакырылучылар тәүдә мәдәният йорты фойесындагы авыл хуҗалыгы җитештерүе нәтиҗәләрен чагылдырган стендларга игътибарын юнәлтте.

Тантана залдагыларга авыл эшчән-нәренең игенчелек һәм терлекчелек өлкәсендәге ирешелгәннәрен чагылдырган видеосюжетларны күрсәтү белән башланды. Аннан соң егетләр һәм кызларны берләштергән вокал төркем хезмәт кешесен данлап җыр башкарды.

Алып баручылар Луиза Ишморатова һәм Радик Әмирханов:

“Табыннарда күпме ризык тора,

Әмма икмәк һәрчак гел түрдә.

Аннан кадерлерәк нәрсә булсын,

Күпме хезмәт салып үстер дә!

Икмәкне аягүрә басып каршы алыйк”, – дип бәйрәм тантанасын дәвам итте.

Бәрәкәтле Чакмагыш туфрагында үскән бодайдан пешерелгән күмәчләр тантананың иң югары, затлы бүләге булды. Милли киемнәрдәге сылу кызлар игенчеләребезнең бөек казанышы, яшәү көче –күпереп пешкән икмәкләрне мөхтәрәм кунаклар кулына тапшырды.

Тәүдә муниципаль район хакимияте башлыгы, Башкортстан Республикасының атказанган авыл хуҗалыгы хезмәткәре, авыл хуҗалыгы фәннәре докторы Риф Сәгъдәтулла улы Йосыпов тантанага җые-лучыларны бәйрәм белән тәбрикләде, фидакарьлекләре, ил табынына лаеклы өлеш керткәне өчен рәхмәтен белдерде, игелекле эшләрендә арытаба да уңышлар, гаилә бәхете, сәламәтлек теләде.

Илдә азык-төлек иминлеген тәэмин итүгә чакмагышлыларның лаеклы өлеше турында горурлык белән әйтеп үтте Риф Сәгъдәтулла улы:

– Катлаулы һава шартларында эшләүгә карамастан, районыбыз яхшы күрсәткечләргә иреште. Республика ка-раваенда Чакмагыш игене өлеше гомум җыем исәбендә – икенче, ә һәр гектардан уңыш алу буенча беренче урында булды. Барлыгы 158,9 мең тонна бөртекле һәм кузаклы культуралар җыелды, гектар куәте 32,3 әр центнер тәшкил итте, узган ел белән чагыштырганда 19,8 процентка артыграк булды. “Базы”, “Герой”, “Заря”, “Победа” кооперативларында, җаваплылыгы чикләнгән “Байбулат” җәмгыятендә күрсәткечләр тагын да югарырак. Шикәр чөгендере һәр гектардан 302,5әр центнер уңыш бирде, барлыгы 67,5 мең тонна татлы тамыр казып алынды.

Терлекчеләребезнең фидакарьлеге зур хөрмәткә лаек. Бүгенге көндә сөт җитештерү һәм һәр сыердан сөт савып алу буенча республикада беренче урыннарда барабыз.

Ел барышында 38553 тонна сөт һәм 2869 тонна ит җитештерелде. Авыл хуҗалыгының барлык тармакларында да хезмәт салучы якташларыбыз белән горурланырга хаклыбыз.

Фидакарьлекнең нәтиҗәсе җимешле: 2014 елда да безнең район Авыл хуҗалыгы продукциясе җитештерүдә югары күрсәткечләргә ирешкән өчен Башкортстан Республикасы Хөкүмәте Дипломына лаек булды.

“Базы” авыл хуҗалыгы кооперативы бөртекле һәм кузаклы культураларның элита орлыкларын җитештерү буенча иң яхшы хуҗалык булып танылды, Башкортстан Республикасы Хөкүмәте Дипломы белән бүләкләнде. Авыл хуҗалыгы продукциясе җитештерүдә югары күрсәткечләргә ирешкәне өчен “Герой” кооперативына Башкортстан Республикасы Хөкүмәте Дипломы тапшырылды.

Дөньяда күп нәрсәләр үзгәрә, әмма авыл хезмәте һәрвакыт һәркем өчен кирәкле булып кала. Бөек хезмәткәр, тыйнак туйдыручы – крәстиян Русиянең өмете һәм терәге булды һәм шулай булып кала.

Хөрмәтле авыл хуҗалыгы һәм эшкәртү сәнәгате хезмәткәрләре!

Сез игелекле, фидакарь хезмәтегез белән районыбызны данлыйсыз, республика күләмендә мәртәбәле итәсез, тормышыбызны алга әйдисез, социаль яктан тотрыклы, икътисадта алдынгы төбәккә әверелдерүгә зур өлеш кертәсез.

Арытаба да яңадан-яңа җиңүләр яулыйк, тормышыбызны ямьгә төреп яшик, – диде.

Чыгышы соңында Риф Сәгъдәтулла улы бер төркем хезмәт алдынгыларына муниципаль районның Мактау гра-моталарын һәм Рәхмәт хатларын тапшырды.

Чакмагышлыларның хезмәт шатлыгын уртаклашырга мәртәбәле кунаклар килгән иде. Башкортстан Республикасы авыл хуҗалыгы министрының беренче урынбасары Азат Салават улы Җиһаншинга сүз бирелде.

– Бүген сездә олуг бәйрәм, хөрмәтле чакмагышлылар. Башкортстан Хөкүмәте, Авыл хуҗалыгы министрлыгы һәм шәхсән үземнең исемемнән тырыш хезмәтләрегез, ил табынын баетуга керткән лаеклы өлешегез өчен зур рәхмәт белдерәм, бар-чагызга да бәхет, сәламәтлек, якты киләчәк, имин еллар телим, – дип башлады ул тәбрикләү сүзен. – Сез Башкортстан аграрийлары арасында чагу балкыйсыз, тулай терлекчелек продукциясе җитештерү буенча да, басучылыктан уңыш алуда да әйдәп барасыз, фидакарьлек үрнәкләре күрсәтәсез. Ихлас күңелдән чыккан рәхмәт сүзләрен кабул итегез. Авыл хуҗалыгы һәм эшкәртү сәнәгате көне уңаеннан башкалада үткән тантаналы җыелышта республика Президенты Рөстәм Зәки улы Хәмитовның үзенең чыгышында берничә тапкыр чакмагышлылар ирешкәннәрне атап үтеп, башкаларга үрнәк итеп куюы горурлык хисләре уята. Бүген ирешелгәннәрегезгә яңа казанышлар өстәлсен, үрләр арты үрләр яулар өчен сезнең мөмкинлекләр зур, рәхмәт сезгә!

Азат Салават улы агросәнәгать комплексында озак еллар эшләгән һәм аеруча яхшы хезмәт күрсәткән дистәдән артык чакмагышлыларга Башкортстан Республикасы Авыл хуҗалыгы министрлыгының Почет грамотасын тапшырды.

Аннан соң сүз алган Башкортстан Республикасы Дәүләт Җыелышы – Корылтай депутаты Вадим Васильевич Соколовның чыгышы да хезмәт кешесенә карата тирән ихтирам, чакмагышлылар өчен горурлык хисе белән сугарылган иде: “Районыбыз эшчәннәре авыл хуҗалыгының төрле өлкәләрендә фидакарь хезмәт өлгеләре күрсәтә, җиңүләр яулый. Чакмагышлыларның фидакарьлеге ил күләмендә билгеле. Президентыбыз Рөстәм Зәки улының: “Өстәлемдә бүген – Чакмагыш сөте, икмәге”, – дип белдерүе – райондашларымның тырыш хезмәтенә югары бәһа.

Бүгенгебез данлы, киләчәгебез якты, өметле. Чакмагыш җиренең булдыклы халкы дигән югары исемебезне һәрчак тырыш хезмәтебез белән аклыйк, илебез иминлегенә һәрвакыт лаеклы өлеш кертик”, – диде ул, хезмәт алдынгыларына бүләкләрен тапшырды.

Аннан соң сәхнәгә, бәйрәм белән котларга Башкортстан Республикасы Дәүләт Җыелышы – Ко-рылтай депутаты Наил Җәүдәт улы Баһаветдиновның ярдәмчесе Фаил Заһит улы Хә-мидуллин чакырылды.

– Кайчандыр Илеш һәм Дүртөйле районнарын мактап сөйли идек, ә хәзер сез, чакмагышлылар, ырамлы адымнар белән алга барасыз, авыл хуҗалыгы продукциясен елдан-ел күбрәк җитештерәсез. Башкортстан Республикасында гына түгел, чит төбәкләрдә дә билгелесез, данлыклысыз. Җиңел булмаган иге-лекле хезмәтегез сезгә арытаба да уңыш китерсен, ил халкының хөрмәте-ихтирамы белән югары бәһалансын, ныклы сәламәтлек, кешелек бәхете телим, – диде ул, озак еллар фидакарьлек күрсәтеп эшләүче бер төркем райондашыбызга Дәүләт Җыелышы – Корылтай депутаты Наил Баһаветдиновның Рәхмәт хатын тапшырды. Бу көнне республиканың безнең район белән хезмәттәшлек итүче эшкәртүче предприятиеләреннән дә вәкилләр катнашты.

Бәләбәй сөт комбинатыннан кил-гән Ольга Степановна Линкевич чакмагышлыларга рәхмәт сүзләрен җиткерде. Аеруча базылыларга, тәүге чордан ук кулга-кул тотынышып хезмәттәшлек алып барган рәисе Вадим Васильевич Соколовка рәх-мәтен белдерде. Актив сөт тапшы-ручыларны да бүләкләде ул.

Раевка шикәр заводыннан Татьяна Николаевна Антоненко катнашты.

Бәйрәм тантанасы шулай күтәренке рухта дәвам итте. Анда катнашкан һәркем районы өчен горурлык хисе кичергәндер. Хезмәт кешесенең данлануы яшьрәкләр күңелендә киләчәктә тагын да чәмләнебрәк эшләү дәрте уяткандыр, ә менә инде хаклы ялда булганнарны бераз моңсулаткандыр да. “Их, бүгенге куәтле техника безнең яшьлектә булсамы?! Хөррият хәзер, яшьләр кадерен белеп кенә эшләсеннәр иде”, – дип әйтеп куйды хаклы ялдагы механизатор бүгенгене үткәннәре белән чагыштырып. Салкын кышта, ачык һавада трактор ремонтлаганын исенә төшереп уфтангандыр. Аның сүзләрендә хаклык ята, ирексездән тарих төпкеленә алып кайта.

Җир кешене туйдыра, үзенә сыендыра. Авыл кешесенең бар кәсебе аның белән бәйле. Борынгы бабаларыбыз үз җирен баласына, туганнарына мирас итеп калдырган бит. Бу хокук 1917 елда “Җир турында декрет” барлыкка килгәннән соң гына юкка чыгарыла. Үткән гасырның утызынчы елларында илебездә күмәк хуҗалыклар оешуын, крәстиян тормышында бөтенләй башкача яшәү рәвешен барлыкка китерүен яхшы беләбез. Фәкать шул күмәклек белән Туган ил азатлыгы өчен тиңдәшсез, изге сугышта җиңү яуланган. “Туган илем, җирем өчен!”, — дип “Ур-ра!” кычкырып атакага күтәрелгән ва-тандашлар. Ә тылдагылар исә бер-гәләп фронттагылар өчен, Җиңүне якынайту өчен дип тырышкан.

Җиркәй! Тарту көчең көчле си-нең! Төрле сәясәтнең авырлыгын кичерә җир кешесе. Үзе интегеп үстергәннең файдасын күрмәгән чакларны онытырлыкмы?! Сауган сөт-нең граммына кадәр калдырмыйча алганда йөрәкләре телгәләнгәндер авыл кешесенең. Сөт-майны шәһәрдән ташып задание үтәгәннәрен өлкән буын вәкилләре әле дә тетрәнеп искә аладыр.

Кешене – җир, кешелекне шул җирдә бил бөккәннәр туйдыра. Җирен сөйгән авырлыгына да түзә. Гомер буе түзгәннәр, әллә ни тирәнгә китмичә, үзебезгә яхшы таныш булган Хрущев заманындагы шәһәрләштерү сәясәтенә әйләнеп кайтыйк әле. Мал-туар асрауда чикләүләр белән тарихның шомлы битләренә кереп калды ул. Сыер бер баштан артмасын, дип шарт куела. Ул чакта бозаулар тумас борын хөкүмәткә тапшыру өчен контрактлаштырыла. Кош-корт, хәтта умарта күчләре тоту чикләнә. Дөрес, акыллы башлар боларны авыл халкының яшәү рәвешен яхшырту максатында эшләнә дип аңлатырга тырышты. Имеш, ул колхозда эшләп кайта да, шәһәрчә ял итә: мал азыгы хәстәрләп интекми, ит-сөтне сатып кына ала. Әмма бу сәясәт канга сеңгән, буыннан-буынга мирас булып күчкән, шөгыленә тугры калган авыл кешесен малыннан аера алмады. Бүген исә киң колач белән яшәргә, җирдән файдаланырга, теләгән кадәр мал-туар үрчетергә мөмкинлекләр зур. Үзаллы эш ачарга ярдәм итүче программалар гамәлгә кертелә.

Әйе, үтелгән сукмаклардан хәтер җепләрен сүткәндә, башка-рылганнарны анализлап, бүгенге уңышларга, гомумән, яшәешкә сокланасы гына кала. Чит төбәкләрдә, хәтта күрше районнарда да сө-релмәгән-чәчелмәгән басулар, таралган колхозлар арта барганда районда күмәк хуҗалыклар яшәп калды, эшчәнлек формасын үзгәртеп, камилләштереп, каршылыклы юллар аша матур бүгенгесенә иреште. Бу – район җитәкчелегенең зиһен көче, халкы турында кайгыртучанлыгы, бердәмлелекнең-күмәклекнең куанычлы нәтиҗәсе. Башкортстан Республикасы, башка кайбер төбәкләрдән аермалы рәвештә, социаль өлкәдә эшчәнлекне уңышлы алып бара, икътисадый яктан да тотрыклылыкны саклауга ирешә икән, монда чакмагышлыларның да фидакарь хезмәт өлеше зур. Фәкать безнең районга чит төбәкләрдән өйрәнергә, тәҗрибә уртаклашырга киләләр, тармак буенча республика семинар-киңәшмәләр, һөнәри конкурслар безнең җирлектә югары биеклектә үтә.

Икмәк! Кемнәр генә аны икмәгән, үстергәндә кайнар тирен түкмәгән икән! 1930 елдан башлап күмәк хезмәт җимеше буларак ил табынына куела ул. Еллар аша тәҗрибә туплана. Шул урында сүземне бераз гына саннар белән дәлилләп игътибарны тарих төпкеленә юнәлтү урынлы булыр, мөгаен. 1958 елда районда 58 колхоз оеша, 3 трактор, 1129 сабаннары була. Колхозларда 15 меңнән артык хуҗалык исәпләнә. 1932 елда район буенча бөртеклеләрнең һәр гектарыннан уртача 5,81 центнер ашлык алына. Ә 1946 авыр елда нибары 3,6 центнер була. 1949 елда хәтта 3 центнерга да җитми.

Еллар игенчене үзенчә сыный. 1993 елны хәтерлиләрдер әле өлкән буын кешеләре. Авыр урак булды ул. Айлар буена берөзлексез яуган яңгырлар игенчегә эшләргә ирек бирмәде. Әмма кайнар тир түгеп ел буена салынган хезмәт бушка китмәде: районда һәр гектардан 21 центнер уңыш алынды. 42 мең тонна ашлык сатылды, задание арттырып үтәлде. Фрунзе исемендәге хуҗалыкта (рәисе Марсель Хуҗин исемен хөрмәтләп искә алыйк) гектар куәте 33 центнерга җитте. Техник куәт арта, хезмәт шартлары яхшыра, яңадан-яңа уңышлар яуларга мөмкинлекләр зур хәзер. Ил агасының, бераз гына моңсуланып: “Җырлап кына эшләрлек бит хәзер”, – дип үткән хезмәт елларын искә төшереп, уфтанып, бүгенге яшьләргә көнләшеп каравын да аңларга була. Барлык шартлары булган, камилләшкән техникага идарә итү бәхете тимәгән шул аңа. Әмма ул авыррак елларда гөрләтеп эшләве белән хөрмәтле, күркәм бүгенгесенә җитүе белән бәхетле.

Авыл эшчәннәрен данлау кичәсе ахырына якынлашты, район үз-ешчәннәре чыгышы, башкаладан Ләйлә һәм Рөстәм Галиевлар җитәкчелегендәге артистлар төркеме тәкъдим иткән җыр-моңнар бәйрәмне тагын да чыгурак итте, тәэсирлелеген арттырды.

Чакмагыш игенчесе, данлы синең үткәнең, матур бүгенгең, якты килер көнең. Илне данлап, җирне ямьләп мең яшә, хөрмәтле авыл эшчәне!

Рәзифә Сәхапова.

Гөлнур Хәлиуллина фотолары.

Башкортстан Республикасы Чакмагыш районы өченче чакырылыш муниципаль район Советының унҗиденче утырышы

bikmiew — Thu, 27 Nov 2014 07:32:04 GMT

19 ноябрьдә Башкортстан Республикасы Чакмагыш районы өченче чакырылыш муниципаль район Советының чираттагы – унҗиденче утырышы үтте. Аның эшендә муниципаль район хакимияте башлыгы Риф Сәгъдәтулла улы Йосыпов һәм аның урынбасарлары, хакимият подразделениеләре хезмәткәрләре, авыл биләмәләре башлыклары, предприятие-учреждениеләр, хокук тәртибен саклау органнары, киңкүләм мәгълүмат чаралары вәкилләре һәм башкалар катнашты. Утырышны муниципаль район Советы рәисе Салават Зәки улы Гыйззәтуллин ачты һәм алып барды.

Көн тәртибенә дүрт мәсьәлә чыгарылды:

1. Эшчәнлекнең аерым төрләре буенча алынган табышка бердәм салым салынганда база табышлылыгының корректирлаучы К2 коэффициентын билгеләү турында.

2. Башкортстан Республикасы Чакмагыш районы муниципаль районында Башкортстан Республикасында Балалар хокукларын яклаучы вәкилнең җәмәгать тәртибендә эшләүче ярдәмчесе итеп билгеләүгә кандидат күрсәтү турында.

3. Башкортстан Республикасы Чакмагыш районы муниципаль районының җирле үзидарә органнарына гражданнарның мөрәҗәгатьләре турындагы положениене раслау турында.

4. Башкортстан Республикасы Чакмагыш районы муниципаль район Советының 2012 елның 25 июлендәге 372 санлы “Башкортстан Республикасы Чакмагыш районы муниципаль район Советы карамагындагы яшьләр советын оештыру һәм аның составы турында”гы карарга үзгәрешләр кертү турында.

Көн тәртибенә чыгарылган мәсьә-ләләрне карауга күчү алдыннан муниципаль район Советы рәисе 14 сентябрьдә үткән Бердәм сайлаулар көнендә 14 санлы Юмаш сайлау округыннан сайланган депутат Людмила Анатольевна Дәүләтовага депутат таныклыгын һәм значогын тапшырды, районыбызның артабангы үсеше хакына берлектәге эшчәнлегендә уңышлар теләде.

Беренче мәсьәлә буенча муниципаль район хакимиятенең финанс ресурсларын һәм салым керемнәрен фаразлау буенча секторы мөдире Дилә Шәрифҗан кызы Ханова сүз алды һәм депутатларга база табышлылыгын корректирлаучы К2 коэффициентын билгеләүнең мөһимлеген дәлилләде. Аның чыгышын бюджет, салымнар һәм милек мөнәсәбәтләре буенча даими депутат комиссиясе рәисе ИЛФИР ӘНГАМ УЛЫ ЗАРИПОВ тулыландырды. Тәф-силле аңлатылган мәсьәләне хәл итү депутатлар арасында фикер аермалыклары тудырмады.

Икенче мәсьәлә буенча мәгариф бүлеге начальнигы МӘНЗҮРӘ ҖӘҮДӘТ КЫЗЫ НӘБИЕВА сүз алды һәм бала хокукларын яклау буенча вәкил ярдәмчесе башкарган хезмәт үзенчәлекләре, әлеге вазифага тәкъдим ителүче белгеч кандидатурасы белән таныштырды (Депутатлар тарафыннан хупланган әлеге ханым белән рәсми тәгаенләү булгач таныштырырбыз).

Өченче мәсьәләнең асылын депутатларга Совет рәисе үзе җентекле аңлатты һәм аерым юнәлешләр буенча көчен югалткан карарга үзгәрешләр кертү мөһимлеген дә депутатлар бертавыштан хуплады.

Соңгы мәсьәлә буенча Башкортстан Республикасы Чакмагыш районы муниципаль район Советы карамагындагы яшьләр советы сәркатибе Илшат Рафаил улы Юнысов сүз алып, яңа совет әгъзалары исемлеге белән таныштырды. Депутатлар тәкъдим ителгән кандидатларны да бердәм раслап куйдылар.

Көн тәртибенә куелган мәсьәләләр каралып беткәннән соң муниципаль район хакимияте башлыгы РИФ СӘГЪДӘТУЛЛА УЛЫ ЙОСЫПОВ йомгаклау сүзе белән чыкты, киңәш-тәкъдимнәрен һәм теләкләрен җиткерде.

Илгә бәрәкәтле булсын Чакмагышның икмәге!

bikmiew — Thu, 20 Nov 2014 04:51:11 GMT

Иртәгә Чакмагыш районының авыл хуҗалыгы һәм эшкәртү сәнәгате хезмәткәрләре һөнәри бәйрәмен билгели. Фидакарь хезмәтләре белән ил табыны муллыгын тәэмин итүчеләргә генә түгел, бөтен халкыбыз өчен дә әһәмиятле һәм кадерле бәйрәм ул. Шунысы шатлыклы, республикабыз аграрийларының Русиянең азык-төлек иминлегенә керткән өлешендә, һәр елдагыча, чакмагышлылар зур урынны алып тора.

Республика караваенда Чакмагыш игене быел гомум җыем исәбендә икенче, ә уртача алынган гектар куәте буенча беренче урында тора. Район аграрийлары барлыгы 158,9 мең тонна бөртекле һәм бөртекле-кузаклы культуралар җыеп алды, гектар куәте 32,3әр центнер тәшкил итте, ягъни былтыргыдан 19,8 процентка артыграк булды. Биредә “Базы”, “Герой”, “Заря”, “Победа” кооператив-колхозлары, җаваплылыгы чикләнгән “Байбулат” җәмгыяте игенчеләре аеруча фидакарьлек өлгеләре күрсәтте.

Кабул итү пунктларына барлыгы 67,5 мең тонна татлы тамыр казып алып озаттык, уртача уңышы һәр гектардан 302,5әр центнер тәшкил итте.

Мал азыгы культуралары уңышы да сөендерерлек. Агымдагы кышлату чорына 21,1 мең тонна печән, 105,6 мең тонна сенаж, 117,9 мең тонна силос – барлыгы 73,2 мең тонна сусыл һәм тупас азык берәмлеге, яки һәр шартлы мал башына 37,9ар центнер хәзерләнде.

Сөт җитештерү буенча да республикада алдынгыбыз. Район хуҗалыклары ун айда 38553 тонна сөт җитештереп, эшкәртү пунктларына озатты, һәр сыерга исәпләгәндә уртача 5106шар килограмм тәшкил итә.

Бу уңышларыбызның нигезендә, әлбәттә, гади хезмәткәрләрдән башлап урта һәм югары җитәкчеләрнең, белгечләрнең көндәлек тырыш хезмәте ята. Игенчелектә дә, терлекчелектә дә заманча эшләү ысулларын, яңадан-яңа фән һәм техника казанышларын кыю кертеп, көн һәм төн белән, ял көннәре белән исәпләшмичә, бар-лык мөмкинлекләрдән тулысынча файдаланып эшләгәндә генә көтелгән нәтиҗәләргә ирешеп була. Бу җәһәттән безнең районда иң эшсөяр, иң булдыклы һәм тырыш кешеләр тупланган, дип лаеклы рәвештә белдерә алабыз. Бүген авыл хуҗалыгының барлык тармакларында да хезмәт салучы уңган якташларыбыз белән чиксез горурланырга хаклыбыз һәм киләчәктә дә ирешелгәннәребездән чигенмәбез, ә бәлки, киресенчә, арттыра гына барырбыз, дип ышанасы килә.

Хөрмәтле авыл эшчәннәре!

Һәммәгезне дә һөнәри бәйрәмегез – Авыл хуҗалыгы һәм эшкәртү сәнәгате хезмәткәрләре көне белән ихлас йөрәктән тәбрик итәм! Игелекле, тырыш хезмәтегез белән сез яшәү көче бирәсез, тормышыбызны алга әйдисез, иртәгәге көнгә ныклы ышаныч, илебезнең иминлеген, табыннар муллыгын тәэмин итәсез. Сезнең тырышлыгыгыз аркасында районыбыз данлана, республикабыз Русия күләмендә социаль яктан тотрыклы, икътисад өлкәсендә әйдәп баручы төбәккә әверелде. Алдагы елларда да агросәнәгать өлкәсендә яңадан-яңа җиңүләр яулыйк, авылларыбызның йөзен, тормышларыбызны ямьләп яшик. Һәммәгезгә дә һәм барлык хөрмәтле ветераннарыбызга ныклы сәламәтлек, бәхет-шатлыклар, гаилә иминлеге, мул-җитеш тормышта гел җиңүләр юлыннан гына ышанычлы алга баруыбызны телим. Хезмәтебез бәрәкәтле, гомерләребез озын булсын!

Риф Йосыпов,

муниципаль район хакимияте башлыгы.

Тормышлары көйле, табыннары сыйлы

bikmiew — Tue, 18 Nov 2014 04:59:40 GMT

Һәр хуҗалыкның үз алдынгылары

Җаваплылыгы чикләнгән “Бәхтизин” җәмгыятендә авыл хуҗалыгы кулланылышындагы барлык җирләр 6 мең гектарга якын, шуның 4290 гектардан артыгы – сөренте җирләр. Бөртекле-кузаклы культуралар 2200 гектарда игелде. Байтак мәйданнарны мал азыгы культуралары һәм көтүлекләр биләде.

Бөртеклеләрнең тулай җыемы 47423 центнер булды. Җәмгыятьтә барлыгы 870тән артык баш сыер малы асрала. Кышлату сезонына печән, сенаж, силос тупланды һәм, концентрат азыкларны да кертеп, һәр шартлы малга 49 центнер азык берәмлеге хәзерләнде.

Һәр эшләр уңганнар тырышлыгы белән башкарыла. Гомерен игелекле хезмәткә багышлаганнар чын мәгънәсендә соклану тудыра.

Быелгы уракта комбайнчылар ярышын Гамил Хафизов әйдәп барды. Ул “СК-5”маркалы комбайнда барлыгы 15880 центнер ашлык суктырды. Илмир Ильясов аннан бик азга гына калышты, Рафаэль Яһудин шулай ук алдынгыларга тиңләшергә омтылды. Тезмәгә салуда Альфред Дәүләтшинга тиңләшүче булмады. Басулардан ындыр табагына ашлык ташуда “КамАЗ”автомашиналарында эшләүчеләрдән Азат Мамлиев иң алдынгысы булды: барлыгы 17450 центнер ашлык кайтарды. Ә менә Радис Гайсин (18283 ц.) һәм Әлфир Нәбиуллин (15598) үзләренең шәхси машиналарында эшләде. Туңга сөрүдә Илдус Тимерханов тырышлыгы белән аерылып торды. “Т-150” тракторында 795 гектарда эш башкарды. Айрат Казыйхановның да эшләре көйле барды.

Мал азыгы хәзерләүдә дә шулай ук көнне-төнгә ялгап эшләүчеләр байтак.

Рөстәм Рәфыйков кукуруз урагында – силос салганда алдынгылыкны бирмәде: “КамАЗ” автомашинасында 4250 тонна яшел масса ташыды. Рөстәм Сәхәбинның шулай ук хезмәт күрсәткечләре югары булды — ул 3800 тонна (“МТЗ-1221”) кайтарды. Салам эскертләүдә Зинфир Арсланов (“МТЗ-80”) аерылып торды, 817 тонна туплады.

Печән хәзерләүдә байтак механизатор катнашты. Айдар Шәйнуров, Илнур Сибәтуллин вакыт белән исәпләшми эшләде, 1850-1740ар рулон тупладылар. Әмма бу эштә иң алдынгы урында Гәрәй Исхаков булды: ул ураткан печән төргәкләре 2970кә җитте. Гәрәй – Имәнлекул егете. Авылда мәктәп тәмамлаганнан соң (1981 елда) Чакмагыш һөнәрчелек училищесына юллана, механизатор таныклыгына ия була. Армия сафларына алына, солдат бурычын намуслы үти. Туган ягын сагынып кайткан егет кичекмәстән колхозда яраткан эшенә тотына, бераздан яшь тракторчылар арасында иң уңганы булып таныла. Язгы айларда чәчүдә катнаша, мал кышлату сезонында фермада техника таләп ителгән эшләрне башкара. Техник культуралар игү остасы ул: көнбагыш чәчә, эшкәртә, кукуруз үстерә.

Гәрәй гаилә тормышын да матур корды. Зианчура районы сылуы Наҗия ханым (балалар бакчасы хезмәткәре булды, аңа кадәр китапханәдә, клубта художество җитәкчесе булып эшләде) белән ул һәм кыз тәрбияләделәр, хәзер инде өч оныклары үсеп килә.

Билгеле, тырышып эшләгәннәрнең тормышы көйле, табыны да сыйлы.

Зифа Галиева.