Районыбыз биләмәсендә янгыннарда һәлак булучыларның узган елның шушы чоры белән чагыштырганда күбрәк булуы күзәтелә. Соңгы бәйрәм көннәрендә генә дә районда ике янгын чыкты һәм бер янып китү очрагы теркәлде.
7 мартта Аблай авылында бүрәнәдән салынган йортта ут чыкты. Нәтиҗәдә өйнең эчке стеналары, түшәм такталары янып күмерләнде. Шулай ук йорт милке, документлар юк булды. Электр үткәргеченең кыска ялганышы янгын чыгуның төп сәбәпчесе булуы ачыкланды.
9 март көнендә ике янгын чыкты. Беренчесе – Чакмагышта агач мунчада ут чыгу. Сәбәбе шул ук: хәвефсезлек кагыйдәләренең үтәлмәве, мичне нык кыздырып ягу. Икенчесе Иске Калмаш авылында булды. Дүрт фатирлы йортта чыккан ут зур бәла китерә: милек юкка чыга, фатир хуҗасы янып үлә. Әлеге вакытта янгын чыгуның сәбәбе ачыклана.
Янгынга каршы хезмәт шуны кисәтә: гади генә хәвефсезлек кагыйдәләрен төгәл үтәгез, кече яшьтәге балаларны өйдә караучысыз калдырмагыз, аларга ут белән шаяруның никадәр куркыныч булуы турында әйтеп, искә төшереп торыгыз. Мичкә якканда аны нык кыздырмагыз, тиз янып китәргә мөмкин булган түшәм тактасын, агач стеналарны янмый торган материаллар белән ышанычлы саклагыз. Ә инде төзелеш вакытында тиешле янгын хәвефсезлеге нормалары һәм таләпләре бозылган булса, аны төзәтү чарасын күрегез. Хуҗалыкта искергән электр үткәргечләре булган очракта аларны алыштырыгыз, чөнки күпчелек янгын нәкъ менә шушы сәбәп аркасында чыга да инде. Электр, җылыткыч һәм газ приборларының эшен даими контрольдә тотыгыз.Тәмәке тартканда хәвефсезлек кагыйдәләрен төгәл үтәү дә бәла-казадан саклар. Һәрчак сак, игътибарлы булыгыз! Сакланыгыз, ут-ялкын беркемне дә аямый, гомер буена җыйган милекне минутлар эчендә юк итә, кеше гомерен өзә. Сезнең йорт-ихата хуҗалыгы, туганнарыгыз һәм якыннарыгыз иминлеге бары үзегездән тора.
Марат Фәттахов,
районның янгын күзәтчелеге эшчәнлеге бүлеге инспекторы,
эчке эшләр өлкән лейтенанты.
