17 майга сабанашлык культуралары 34445 гектарда чәчелде (план 59351 га). Шул исәптән, бөртекле, бөртекле-кузаклы, культуралар 26568 га урнаштырылды. Бу планга карата 74 процент тәшкил итә. Көннәрнең җылы, коры торуы, туфракның өлгерүе техник культураларны чәчү мөмкинлеген дә тизләтте. Хәзер шикәр чөгендере, көнбагыш чәчү дә дәррәү бара, бер хуҗалыкта кукуруз чәчелә. «Базы», «Герой» һәм Ленин исемендәге кооперативларда ике көн элек үсентеләрне химик утау башланды. «Герой», «Базы», «Алга» кооперативларында чәчү темпы югары. Башка хуҗалыкларда да эшләр дәррәү бара, аяз көннең һәр сәгате, һәр минуты эш өстендә үтә. Киләсе уңышка нигез салу белән беррәттән, район хуҗалыкларында малларны җәйге көтүлекләргә чыгару буенча да хәстәрлекләр күрелә. Бу җаваплы эшне атна азагына чаклы тәмамлау бурычы куелды. Малларны көтүлекләргә чыгарып җәйге лагерьларда сава башлагач, савым тагын да артты. Кичәге мәгълүматлардан күренүенчә, фермаларда 17 майда 1242,73 центнер сөт җитештерелде. Бу үткән елның шушы чоры белән чагыштырганда 21,1 центнерга артык. Бу көнне дәүләткә 26,77 центнерга күбрәк сөт сатылды. Менә шулай авыл эшчәннәре өчен мәшәкатьле көннәр дәвам итә.
|
