Агымдагы елның 25 апреленнән 25 маена кадәр Башкортстанда автомобиль юлларын төзекләндерү буенча айлык үтә. Бу хактагы карар республика Хөкүмәте боерыгы белән расланган. Айлык чорында юлларның санитар-техник торышын яхшырту, автомобиль юлларында һәм алардагы корылмаларда тәртип урнаштыру, торак пунктлардагы юлларны тәртипкә китерү буенча чаралар күреләчәк. Район, шәһәр, авыл биләмәләре хакимиятләренә һәм предприятиеләргә автомобиль юлларын төзекләндерү, архитектура ягыннан бизәү, ремонтлау буенча бригадалар оештырырга тәкъдим ителә. Айлык барышында асфальт-бетон заводларын ремонтлап сафка бастыру буенча эшләр башкарылачак. Юл читләре тәртипкә китереләчәк.
