Гәрәбәдәй сары бөртекләрне ындыр табагына водительләр Газинур Гыйльванов, Динир Имаметдинов, Динар Солтангәрәев комбайнчыларга бункерлар тулу сәбәпле туктап торырга урын калдырмый ташып торалар. Зәбир Фәнил улы белән әңгәмәләшәбез. Уракка әле яңа керешеп ятулары гына икән. Менә шушы 114 гектарлы басудан көзге арыш гектарыннан уртача 28,2 центнер төшем белән куандырган. Әлеге мәйданны турыга суктырып алганнар. Тагын 300 гектарлабы тезмәләргә салынган, бераз җилләгәч, аларны суктыруга керешәчәкләр икән. Уракка, һәр елдагыча, ныклап әзерләнгәннәр: комплекслы бригада ысулы белән, быелгы һава шартларын исәпкә алып, югалтуларга юл куймыйча эшне тиз тотарга исәпләре. Тиешле күләмдә ягулык-майлау материаллары запасы хәстәрләгәннәр, кыр станында көйләү-төзәтү осталары да кизүдә тотыла. Ашлыкның келәтләргә урнаштырыласы өчен дә, җилгәреп-җилләтеп дәүләткә сатыласы өчен дә махсус саклагычлары әзерләнелгән, ындыр табагындагы механизмнар да тулы тәртиптә. Мал азыгын быел да яхшы запас белән туплыйлар – кимендә ел ярымга җитәрлек булсын, дип.

Ферма эче дә гүя төзелеш мәйданы биредә. Рәис зур канәгатьлек хисе белән терлекчеләр һәм белгечләр өчен яңа уңайлыклар тудырылуын бәян итте. Бүген барлык биналар да карап чыгылган, көз  җәйләүдән кайтасы мал торлаклары тәртиптә китерелеп беткән. Өр-яңа саву залын монтажлап сафка керткәннәр, 100 башка бозау абзары, 80 баш яшь таналар саву каралтысы төзелешләре тәмамлану алдында. Малкайларга ачык һавада йөрер өчен утарларны тигезләп, тыгызлап вак таш салып чыкканнар, тирес өемнәрен басуга чыгарып бетереп киләләр. Гомумән, зарялыларның бер генә тармакта да сынатмаячагына шик юк. Зәбир Фәнил улының ныклы терәге – бердәм командасы белән әллә нинди биеклекләрне яулау да һич авыр булмаячагы көн кебек ачык. Өлкән агроном Азат Гайсин, бригадир Марат Казыйханов кебекләр белән, мәсәлән. Алар — сүзне бушка аударудан ерак тора торганнардан, хуҗалык алга барсын дип җиң сынганнардан. Ә мондыйлар белән һич икеләнми тау-ташларны күчерергә була. Шулай булсын да.