Лауреат булып кайттылар  Милләтара татулыкны ныгыту елына багышлап, республика районнарында сәнгать осталарының бәйгесе үткәрелде. Аның зона ярышы безнең районда да узды. Дүрт районның җыр һәм бию осталары арасында чакмагышлылар беренче урынга чыкты һәм финал бәйгесендә катнашу хокукы алды.Башкортстан Республикасы халыкларының милли мәдәнияты фестиваленең финалы – Гала-концерты башкалабызның Нефтьчеләр сараенда 8 декабрьдә үтте. Республикабызның иң көчле талантлы җыр-моң ияләре җыелган иде анда. Тирә-як районнардан бары тик безнең районнан гына финалга чыккан биючеләребез монда да сынатмадылар, күңелләрне җилкендерерлек дәртле биюләре белән жюриның да, тамашачыларның да күңелен яуладылар. Һич арттыру түгел, "Гармун” һәм "Керәшен татарлары” биюләре "Асылъяр” һәм "Чакматаш” бию ансамбльләре башкаруында да бик матур, халыкчан килеп чыкты, профессиональ сәнгать дәрәҗәсенә ирешелде. Бу ике бию коллективының да осталыгы югары бәһаланды, Гала-концертның лауреаты булды. Әлеге биюләрне Башкортстанның атказанган мәдәният хезмәткәре Фәнилә Даутова салды. Луиза Ишморатова, район мәдәният йортының художество җитәкчесе.
|
