Узган елда 623 мең киловатт- сәгать электр энергиясе кулланылган. Бу, һәр дүрт авылда да сөтчелек фермаларының, ә Тайняшта машина-трактор мастерское, ашлык чистарткыч һәм башка күп төрле объектларның булуын  исәпкә алсак, әлләни  зур сан түгел. Кышкы айларда терлекчелек фермаларында һәм мастерскойларда биналарны, суны мичкә утын ягып җылытып, шактый күләмдә электр энергиясен экономияләүгә ирешәләр.

Фәргать Фәрит улы үзенең чыгышында әле файдаланып бетмәгән резервлар, эштәге җитешсезлекләр турында да сөйләде. Әйтик, ит җитештерү рентабельле түгел, былтыр элекке елга караганда ул 110 центнерга азрак җитештерелгән. Зыянга түгел, ә файда китерсен өчен көндәлек артымны,  бигрәк тә җәйге айларда  арттырырга, малларны ашатуны яхшыртырга кирәк, диелде. Мал азыгының сыйфатын ныклы контрольдә тотарга, азыкны әрәм-шәрәм итмәскә. Шулай ук көнбагыш игү дә зыян китерә. Бу культура белән ныклап шөгыльләнгән хуҗалыклар (мәсәлән, "Базы”, "Октябрь” кооперативлары) көнбагыш игүдән зур табыш ала. Фермаларда терлекчеләрнең эш шартларын тагын да яхшырту — көн үзәгендә торган мәсьәлә. Әлеге вакытта Тайняш сөтчелек фермасында "500 ферма” республика программасы кысаларында яңарту, малларны бәйсез асрауга күчерү буенча эш алып барыла. Башка фермаларны да яңартып тору бурычы тора.

Көн тәртибенә куелган икенче мәсьәлә – күзәтчелек итү советы (элекке ревизия комиссиясе) рәи-се Әлвәт Гайсин башкарылган эшләргә хисап тотты. Ул хуҗалыкның югары рентабельле эшләве өчен  кооператив-колхоз идарәсе тара-фыннан ел дәвамында күрелгән нәтиҗәле чараларга тукталды. Соңгы елларда күпләп заманча техника сатып алу, эштә яңа алымнар кертү, хезмәт кешесен матди һәм мораль кызыксындыру чараларын киң кул-лану, хуҗалык эшчәнлегендә яхшы исәп һәм ныклы контроль булдыру, эшкә тиешле бәя бирү, хезмәт хакын үзвакытында түләү, коллективларда хезмәт тәртибен бозу очраклары булмавы хуҗалыкның тотрыклы эшләвенә, җитештерүне арттыруга булышлык итә, диде. Хезмәткә түләү аена уртача 14750 сумга җиткән.Бу элекке елдагыдан 2990 сумга (үсеш – 125,4 процент) артык һәм ул ай азагында билгеле вакытта һәркемнең картасына күчерелеп барыла. Моннан тыш, күп кенә күләмдә акчалата премияләр түләнә, хезмәт алдынгылары сыер малы белән дәртләндерелә. Халыкка мал азыгы – печән, салам, ашлык бирелгән. 4 кеше путевка белән Октябрьский шәһәрендә ял итеп, сәламәтлеген ныгытып кайткан, янә 6 кеше барачак. Күзәтчелек  советы һәр айда мал, шул исәптән бозаулар исәбен алуда, малларны бракка чыгаруда, авыл хуҗалыгы машиналарын, милекне, башка әйберләрне инвентарьлаштыруда, язгы кыр эшләрендә, урак вакытында, мал азыгын куллануда, халыкка мал, печән биргәндә һәм башка күп төрле эшләрдә турыдан-туры катнашкан.

Җыелышта төп докладлар буенча фикер алышуларда баш агроном Әгъләм Хәмитов, баш инженер Ирек Сәлихов, баш зоотехник Марат Мофаззалов, бригадирлар – Тайняштан Фәдис Кәримов, Әхмәттән Нәзир Әхмәтҗәнов, Иске Балактан Инсаф Шәрипов , Караннан Рәшит Хисамов катнашып,үткән елгы эш нәтиҗәләре белән  таныштырдылар, бригададагы хезмәт алдынгылары турында сөйләп, аларга рәхмәт сүзләрен җиткерделәр. Гомум җыелышта үзара ярышучы  "Октябрь” кооперативы рәисе Альберт Мусин, муниципаль район хакимияте башлыгының финанс мәсьәләләре буенча урынбасары-муниципаль район хакимиятенең финанс идарәлеге начальнигы Равил Фәезов чыгыш ясады. Муниципаль район хакимияте башлыгының беренче урынбасары Ригат Хаҗиев үзенең чыгышында "Герой”кооператив-колхозының елны яхшы күрсәткечләр белән тәмамлавын билгеләде. "Сезнең хуҗалык хәзер республика күләмендә билгеле. Сездә күрсәтердәй нәрсәләр бар. Эш күрсәткечләрегез югары, районыбызның тотрыклы үсешенә зур өлеш кертәсез. Моның белән горурлана аласыз”, – диде ул эшсөярләр төбәгендә яшәүчеләрнең хезмәтен югары бәһалап, геройлыларның узган хуҗалык елында ирешкән уңай якларын билгеләп үтте. Сөт җитештерүгә аерым тукталды. Әгәр район көн саен дәүләткә 104 тонна сөт сата икән, шуның 15,5 тоннасы шушы хуҗалыктан озатыла. Ә бит моның өчен һәр көнне эшне югары дәрәҗәдә оештырып, зур хезмәт салырга кирәк. Басучылыкта бер елда күрсәткечләрне кискен арттырып була, ә терлекчелектә моңа күп еллар дәвамында яхшы эшләгәннән соң гына ирешә аласың. Колхозчыларга хезмәт хакын түләү буенча район хуҗалыклары арасында икенче урында тору да мактауга лаек. Яхшы эшләгәч, хезмәт хакы да югары һәм ул ел саен артып тора. Дәртләндерү чаралары киң кулланыла. Колхоз шәхси хуҗалыкларга мал асрауда нык ярдәм итә. Шунысын да әйтеп үтәргә кирәк, менә дистә еллар дәвамында халыктан дәүләткә сөт сату күрсәткече районда иң югарысы булып кала. Шәхси хуҗалыктан арткан сөт, шулай ук мал сатудан да кешеләр үзләренең тормыш-көнкүреш хәлен яхшырта. Тагын бер мисал:  Тайняш авыл Советы биләмәсе авылларында яшәүчеләрнең социаль иминлеге күрсәткечләре (монда күп төрле фактор исәпкә алына) республикада иң яхшылар исәбендә икән.

Сүз дә юк, күмәк хуҗалык та, шәхси хуҗалык та бай булгач, җитештерүне үстерергә, тагын да яхшырак яшәргә мөмкинлекләр арта гына бара. Әйткәндәй, бу хуҗалыкның салым һәм башка түләүләр буенча бурычлары юк, диярлек. Булса да — аз. Ел дәвамында бюджетка 3 млн. 200 мең сум акча кертелгән. Бу – районда дүртенче күрсәткеч. Элекке елда сигезенче урында торган, ягъни үсеш ике тапкыр, дигән сүз.

"Ирешелгәннәр чик түгел. Сез ашлыкның тулай җыемын 100 мең центнер һәм аннан да күбрәккә арттыра аласыз. Сөт җитештерүдә дә шулай ук үсеш юллары бар. Моның өчен сезнең мөмкинлекләрегез җитәрлек”, – дип билгеләде Ригат Нурый улы үзенең чыгышында.

Җыелышта  кооператив-колхоз идарәсенең 2013 елгы эшен ка-нәгатьләнерлек дигән карар кабул ителде. Агымдагы елга планнар билгеләнде, тәгаен бурычлар куелды. Составында өч кешедән торган күзәтчелек  советы, аның рәисе итеп Әгъләм Рәхимов сайланды. Профсоюз оешмасы белән килешү үтәлеше тикшерелде. Соңыннан бер төркем хезмәт алдынгыларына акчалата премияләр, кыйммәтле бүләкләр тапшырылды. Сүземне шагыйрь Рәдиф Тимершинның "Хезмәт” дип аталган дүртьюллык шигыре белән тәмамлыйсы килә:

Тормыш – иң кадерле нәрсә,

Тормыш нигезе – хезмәт.

Хезмәт сүнсә, тормыш сүнә,

Сүнү – хезмәттән бизмәк.

Эш дигәндә тәвәккәл, егәрле, уңган-булган, үз җирен кадерләп, игелекле хезмәтләре белән туган ягын тирә-якка танытып-данлап, ил табынын баетып яшәүче бу төбәк халкына алдагы көннәрдә дә уңышлар телибез.