 Чакмагыш егете Ленар Рәшитов белән Иске Калмаштан Вадим Кәбиров быелдан башлап Туймазы шәһәрендәге "Олимпияче-Альянс” спортчылар әзерләү интернат-мәктәбендә белемнәрен күтәреп, осталыкларын ныгытачак. Аларның үзләрен чын ринг осталары итеп танытачаклары һичшиксез, алда әле.Район үзәгендә "Чыңгыз” боксчылар клубында тренер Илгиз Габделхәй улы Ибраһимов кул астында шөгыльләнеп, егетләрнең икесе дә сизелерлек нәтиҗәләр күрсәтте. Район, республика күләмендәге мәртәбәле ярышларда тәҗрибә туплап, Русия күләменә дә чыкты алар. Ленар, мәсәлән, күптән түгел Татарстанда үткән бәйгедә чемпион исемен яулады, Вадим да анда үзен сәләтле спортчы итеп күрсәтә алды. Икесе дә – икенче разряд нормативларын үтәгән боксчылар. Өметле киләчәк баглаган егетләрне күреп алып, әнә шулай махсус спорт мәктәбенә кабул иттеләр. Тәҗрибәле педагоглар, оста спортчы-тренерлар кул астында аларның тагын да югарырак уңышлар яулаячагына ныклы өметләнәбез. Биеклекләрне кыюлар яулый, диләр. Чакмагыш җиренең кыю, тәвәккәл уллары Ленар белән Вадим бокста да, кикбоксингта да үз сүзләрен әйтәчәк әле. Рузилә Әмирханова, БДУ талибәсе.
|
