10 октябрьдә, Республика көне алдыннан, Уфада Башкортстан Рес-публикасы Президенты Рөстәм Зәки улы Хәмитов Русия Федерациясе һәм Башкортстан Республикасының дәүләт бүләкләрен тапшырды. Республикабызның сәнәгать, авыл хуҗалыгы, төзелеш комплексы, хокук тәртибе  саклау органнары, социаль өлкә, сәламәтлек сагы, мәдәният һәм сәнәгать тармакларының 45 хезмәткәренең фидакарьлекләре мактаулы исемнәр, Почет грамоталары, Рәхмәт хатлары һәм орденнар белән билгеләнде. Бүләкләнүчеләр арасында муниципаль район хакимияте башлыгы Риф Сәгъдәтулла улы Йосыпов та бар. Русия Федерациясе Президенты Владимир Владимирович Путинның агымдагы елның 23 июнендәге 193-рп санлы карары белән Риф Сәгъдәтулла улы хезмәтендә ирешкән уңышлары, гуманитар өлкәдәге казанышлары, актив җәмәгать эшчәнлеге һәм озак еллар намуслы хезмәте өчен Русия Федерациясе Президентының Рәхмәтенә лаек булды.