67 ел тыныч тормышта яшибез. Яу кырында батырларча баш салганнарны онытырга хакыбыз юк, җиңү яулап кайтканнар олуг хөрмәткә ия.Хәтер һәм кайгы көненә багышланган чара Җиңү паркында, батыр ватандашларыбыз истәлегенә куелган обелиск янында үтте. Чарада катнашучылар Бөек Ватан сугышында һәлак булган якташларыбызны, аннан соң вафат булган сугыш ветераннарын бер минут тын калып искә алдылар. Һәйкәлгә чәчәкләр салынды.
Район хакимияте башлыгы урынбасары Геннадий Фотеевич Крюковның чыгышы сугыш ветераннарына карата тирән хөрмәт белән сугарылган иде. "Сугыш яралары уңалмый, хәтерләрдән җуелмый. Бөек Җиңү таңын тудырган, безгә бәхетле тыныч тормыш яулап биргән өлкән буын кешеләренә рәхмәтләребез чиксез”, – диде ул.
Район хатын-кызлар советы рәисе Эльвира Газизова, ветераннар советы рәисе Идгар Еникеев, китапханә хезмәткәрләре Алсу Гәрәева һәм Ильмира Шәфыйкова сөйләп үтте, шигырьләр укылды. 39 ел гомерен мәгариф системасында эшләп үткәргән хезмәт ветераны Зәүлә Низаметдинова авыр сугыш елларын тетрәнеп искә алды.
–Безнең Җәмәй авылыннан фронтка сиксәннән артык кеше китте, 39ы гына әйләнеп кайтты. Исән калганнарының да сәламәтлеге бик чамалы булды. Күпләре якты дөньяның рәхәтен аз күрде.
Гаиләбездән сугышка 15 кеше алынды, нибары дүртесе әйләнеп кайтты. Ул көннәрнең мәңге онытыласы юк, – диде.
Анастасия Полякова, Сабит Кәримов сугыш чоры җырларын хәтергә төшерде. Районның имам-мөхтәсибе Галим хәзрәт Шакиров күңелләргә үтеп керерлек вәгазь сөйләде, башкача сугыш булмасын, халыклар дус яшәсен, җир йөзендә бәхет һәм шатлык кына хөкем сөрсен, кайгы-хәсрәт ерак йөрсен, дип дога кылдылар.
Рәзифә Сәхапова.
