Механизаторлар Камил Фәйрузов ("Нива-эффект” комбайнында) белән Айрат Галиев ("Лида-1300”) үзләренә беркетелгән басу корабларын җитештерүчәнле (икесенең дә күрсәткечләре 1000әр центнердан арткан инде) эшләтергә омтыла.  Басудан ындыр табагына гәрәбәдәй сары бөртекләрне шоферлар Фәндәлис Шакиров, Алмаз Кәбиров, Радик Ибраһимов һәм Илдар Гәрәев ташый. Ындыр табагында үлчәүче Лилия Шәрипова кабул иткән игеннәрне, җилгәргеч агрегат аша уздырып, Рәсим Китапов келәткә урнаштыра, дәүләткә тапшырыласын тиешле кондициягә җиткереп, элеваторга озатырга әзерли.

Хуҗалыкка ярдәмгә килгән "Үзәк” машина-технология станциясе механизаторы Рим Кинҗәбулатов та  "Дон-1500” маркалы комбайнында 1000 центнердан артык ашлык җыеп алган инде. Урып-җыюны вакытында төгәлләр өчен үз өлешен кертүеннән канәгать комбайнчы егет, тук башаклы үсентеләрне кистерә-кистерә, алга омтыла.

Илнур Рәҗәпов янгын сүндерү машинасында кизүдә тора. Бөртеге дә кадерле игеннәрне ут-күз юкка чыгармасын өчен биредә шулай  хәстәрлек күргәннәр.

Хуҗалыкның баш инженеры Вазих Ихсанов, икенче бригада бригадиры Венер Шәрифуллин техника төзек эшләсен, уракта өзеклек булмасын өчен тырыша. Кыскасы, ленинлыларның ниятләре ныклы: вәгъдә ителгәнчә, уракны кыска вакыт эчендә, югалтуларга юл куймыйча тәмамлау өчен кулдан килгәннең барысын да эшләячәк алар.