Иген язмышы хәл ителер чак - 17 Июля 2012

Басуларда яңа уңыш өлгерде. Соңгы вакытта көннәрнең бик нык эссе торуы уҗым һәм сабанашлык культураларының өлгерүен тагын да тизләтте. Игеннәрнең иртә өлгерүе аркасында быел узган елга караганда уракка шактый иртәрәк төшәргә мәҗбүр итте. Шимбә көнне җаваплылыгы чикләнгән "Бәхтизин” җәмгыятендә иген уңышын җыю һәм уҗым культураларын чәчү, чиста һәм биләмә пар җирләрен әзерләү мәсьәләләренә багышлап район семинар-киңәшмәсе үткәрелде. Анда хуҗалык җитәкчеләре, баш агрономнар һәм инженерлар, икътисадчылар, хезмәтне саклау буенча җаваплы кешеләр, профком рәисләре катнашты.