Агымдагы елның 23-24 июнендә Авыргазы районының "Дуслык” авыл хуҗалыгы кооперативы (нәсел заводы) җәйләвендә машина белән сыер саву осталарының егерме алтынчы республика конкурсы үткәрелде. Анда 54 районнан иң тәҗрибәле hәм оста 75 савучы катнашты. Биш этаптан торган бу бәйгедә терлекчеләр үзләренең белемен hәм осталыкларын күрсәтте.

Шунысы шатлыклы, бу конкурста катнашкан безнең районның данын яклаучылар – "Базы” авыл хуҗалыгы җитештерү кооперативыннан Венера Байбулдина белән җаваплылыгы чикләнгән "Байбулат” җәмгыятеннән Гөлназ Нәҗмиева сынатмадылар. Венера Тимерҗан кызы иң югары балл җыйды hәм беренче урынны яулады. Шулай итеп, ул машина белән сыер саву операторларының егерме алтынчы республика конкурсы җиңүчесе булды. Аңа беренче дәрәҗә Диплом, чемпион тасмасы тапшырылды, 13 мең сум акчалата премия hәм кесә телефоны белән бүләкләнде.

Конкурста җиңүчене hөнәри бәйгедәге шушы зур җиңүе белән чын күңелдән котлыйбыз hәм тынгысыз хезмәтендә яңадан-яңа уңышлар телибез!

Рәшит Вахитов.