"ЮТэйр” авиакомпаниянең АТR пассажир самолеты иртәнге 5 сәгать 35 минутта (Мәскәү вакыты) 43 пассажиры белән Төмән шәһәреннән 16 километр ераклыкта урнашкан "Рощино” аэропортыннан күтәрелә. Әмма озак та үтми, аның белән элемтә өзелә. Самолет Горьковка авылы янында аэропорттан 2,5 чакрым   ераклыкта җиргә барып төшә. Коткаручылар (медицина хезмәткәрләре, янгын сүндерүчеләр) тиз арада һәлакәткә таручыларга ярдәм итә башлый. Белгечләр "кара тартма”ны табалар. Тикшерү вакытында самолетка идарә иткән вакытта яки җирдәге хезмәтләр ялгышлыгы яисә техник төзексезлек авариягә китергән, дигән фикерләр әйтелә. Теракт турындагы фаразлау расланмый.

Каза күрүчеләргә, һәлак булучыларның гаиләләренә әхлакый һәм матди ярдәм күрсәтелә. Төмән өлкәсендә һәм Ямал-Ненец автономияле өлкәсендә өч көнлек матәм көннәре игълан ителде.

Әлеге вакытта "кара тартма” җентекләп өйрәнелә, ул яхшы торышта сакланган.

Самолетның әлеге очышка тиешенчә әзерләнмәве авиаһәлакәткә китергән сәбәпләрнең берсе булырга мөмкин диләр белгечләр. Очып китәр алдыннан канатлар боздан арындырылырга, чистартылырга тиеш, ә бу ни өчендер эшләнмәгән. Шунлыктан самолет күтәрелеп китә алмаган, ян-якка янтаеп, җиргә барып төшкән.

Икенче берәүләр, бу самолетның ничек очып баруын күрүчеләр, самолет артыннан төтен сузылып калуы һәм аннары тонык шартлау тавышы (хлопок) ишетелүе турында сөйлиләр. Бу авария ни сәбәпле булган, анда кем гаепле – анысын белгечләр һәм экспертлар соңрак әйтер. Әмма фаҗигадә һәлак булганнарны, кешеләргә, гаиләләргә килгән олы кайгы-хәсрәтне, зур югалтуларны берничек тә кире кайтарып булмый…

Инде андый фаҗигаләр күктә дә, җирдә дә, суда да башкача берүк кабатланмасын, дип телибез. Ә зур кайгыга тарыганнарга Ходай сабырлык бирсен.

Без дә аларның авыр кайгысын уртаклашабыз.