Авыл тормышының төрле якларына кагылышлы мөһим мәсьәләләр күтәрелде профилактика көнендә. Бәшир авыл Советы авыл биләмәсе хакимияте башлыгы Рәмзия Җәүдәт кызы Вәлиева чыгыш ясап, төп игътибарны биләмә авылларында ныклы җәмәгать тәртибен булдыруга юнәлтте. Кешеләр сәламәтлеген саклауга кагылышлы проблемаларны да күтәрде. Полиция начальнигының җәмәгать тәртибен саклау буенча урынбасары Радик Вәзих улы Сәяхов районда җинаятьчелекне булдырмау буенча район эчке эшләр бүлеге хезмәткәрләре тарафыннан алып барылган эшләр белән таныштырып үтте. Аерым алганда, йортта алкоголь эчемлекләр сатуга бәйле фактлар, хокук тәртибен, закон таләпләрен бозучыларга карата җаваплылык турында сөйләде.
Янгын күзәтчелеге бүлеге инспекторы Марат Салават улы Фәтыйхов районда янгын хәвефсезлеге торышы белән таныштырды. Район үзәк дәваханәсе табибы Урал Рәүзеләнәф улы Ирназаровның чыгышы эчкечелеккә, наркоманиягә каршы көрәшүгә багышланган иде. Балигъ булмаган балалар эшләре һәм аларны яклау буенча комиссиянең җаваплы сәркатибе Ләйсән Таһир кызы Низамова балигъ булмаган балалар арасында хокук тәртибен бозуларны булдырмауга, бу өлкәдә профилактика-кисәтү чараларына тукталды. Район ветстанциясе баш табибы урынбасары Тәслимә Рәис кызы Халикова малларда йогышлы һәм башка чирләрне булдырмау буенча күрелгән чаралар турында сөйләп, киңәшләрен бирде. Табигатьне саклау буенча дәүләт инспекторы Наил Рәшит улы Газизов авылларда табигатьне саклау, биләмәне чиста тоту, чүплекләр торышы, экология проблемалары хакында уй-фикерләрен әйтте.
Эшлекле барган әлеге сөйләшүгә муниципаль район Советы сәркатибе Илгиз Фаил улы Ихсанов йомгак ясады.
