“Гаилә” фотоконкурсыннан – җиңү белән! - 24 Декабря 2012

Русия Федерациясе Дәүләт учреждениеләре һәм җәмә-гатьчелекне хезмәтләндерү оешмалары хезмәткәрләре профсоюзының Башкортстан Республикасындагы оешмасы үткәргән төрле конкурс һәм бәйгеләрдә безнең район оешмасы да актив катнашып килә һәм матур гына уңышларга да ирешә. Быел көз чираттагы – "Гаилә” конкурсында Чакмагыш телевидениесе операторы Рим Гамил улы Баянов төшергән фоторәсем "Балалар белән бергәбез” номинациясендә беренче урынны яулады. Җиңүче булып чыккан әлеге рәсемдә муниципаль район хакимияте аппараты бухгалтеры, профсоюз әгъзасы Гөлнара Әхәт кызы Ильясованың гаиләсе ял вакытында төшерелгән. Тормыш иптәше Нәйфәл Әнфәл улы белән ике ул үстерә алар. Илнар зур үскән инде – беренче урта мәктәпнең җиденче сыйныфында белем ала, Илвир әлегә "Шатлык” балалар бакчасында тәрбияләнә. Тату гаиләдә ата-баба традицияләрендә сәламәт яшәү рәвеше белән тәрбияләнүче ике егет солтаны менә шушы рәсемдәгечә гомер буена үзләренә изгелеккә юл ярачаклар, ә кадерле әти-әниләре әнә шулай ныклы терәк, юл күрсәтүче маяк булып калырлар, дип өметләнәбез.