Дәүләтебез тарафыннан авылларның инфраструктурасын үстерү, социаль-көнкүреш уңайлыклары булдыру – гомумән, авыл һәм шәһәр арасында аермалыкларны киметү максатында эшчәнлек алып барылуы куанычлы хәл. Авыл халкы да хәзер йортларны иркен итеп төзү генә түгел, анда бөтен уңайлыклар тудыруны гадәти хәл итеп күрә. Берсеннән-берсе күркәмрәк биналарны заманча төзелеш материаллары кулланып төзү, һәркайсына электр, газ, су үткәрү, шул ук вакытта йорт эчендә душ, шәһәрдәге кебек җылы бәдрәф булдыру көн таләбенә әверелде диярлек.
"Кеше кайда гына яшәмәсен, уңайлы шартларга ия булырга тиеш”, – диелә "Авылларны социаль үстерү” дигән максатлы дәүләт программасында. Аны үти барып, соңгы елларда Үрнәк авыл Советы авыл биләмәсенә караган авылларда киң колачлы төзелеш эшләре җәелдерелде. Тәү чиратта урам юллары төзекләндерелә, электр һәм газүткәргечләр, су белән тәэмин итү линияләре реконструкцияләнелә, яңа төзелешләр барган урамнарга тиешле инженерлык челтәрләре салына.
2012 елда Аблай авылында 12 километр суүткәргеч линиясе яңартылды, су алу башнясы урнаштырылды. Әлеге максатта дәүләт программасы нигезендә 10384505 сум бюджет чыгымнары тотынылды. Хәзер һәр урам колонкасында көчле басым астында эчә торган су алу мөмкинлеге бар, күпләр аны өйләренә үк суздылар әле. Аларның күбесендә инде автомат кер һәм савыт-саба юу машиналары эшли, душ кабинетларында җылытылган су белән коену мөмкинлеге бар, хәтта бәдрәфкә дә ихатага чыгасы юк, диярлек. Суны да чыгарып түкмиләр, ә һәрберсенең үз канализация челтәре бар.
Шундый ук уңайлыклар бәләкәй авыллардан исәпләнгән Көсәкәйдә дә тудырылды: биредә 2013 елда 7 километрлы суүткәргеч төзүгә 3199402 сум бюджет акчасы юнәлтелде. Шунысы куанычлы, яңа системада су белән тәэмин итүдә өзеклекләргә юл куелмый, хәзер аларны хезмәтләндерү өчен ышанычлы хуҗалык белән аренда килешүе документлары тутырыла.
Киләчәктә мондый мәшәкатьләр биләмәдәге һәр авылда да үтәләчәк, дип ышандырабыз. Бер үк вакытта газ, электр энергиясе белән тәэмин итү челтәренә дә зур игътибар юнәлтеләчәк, юллар каралачак. Дәүләт программасы чикләрендә Чакмагыш – Языково юлының Күчәрбайга кадәрге өлешенә асфальт түшәү мәсьәләсе дә хәл ителергә тора. Быел анда зур күләмле эшләр башланачак. Авылларны тоташтыручы юлларның да якын арада тәртипкә китерелеп бетәчәгенә шик юк.
Дәүләт тарафыннан күрелгән хәстәрлекнең кадерен белеп, зур чыгымнар салынып төзелгәннәрне күз карасыдай саклап, фидакарь хезмәтебез белән җавап бирергә генә кала безгә.
Рәфидә Исмәгыйлева,
Үрнәк авыл Советы авыл биләмәсе хакимияте башлыгы.
