Язга чыксаң, авылда мәшәкатьләр берсе артыннан икенчесе тезелеп кенә тора, аларның һәркайсын үзвакытында аткарып барырга кирәк. Менә тагын кызу мәл – мал азыгы хәзерләү белән беррәттән, уракка төшәргә дә вакыт җитте. Басуларда барыбыз өчен дә көтеп алынган яңа уңыш өлгерә. Соңгы вакытта көннәрнең эссе торуы уҗым һәм сабанашлык культураларының өлгереп җитүен тагын да тизләтте.Якшәмбе көнне җаваплылыгы чикләнгән "Байбулат” җәмгыятендә үткәрелгән район семинар-киңәшмәсендә иген уңышын җыю һәм уҗым культураларын чәчү мәсьәләләре тикшерелде. Анда хуҗалык җитәкчеләре, баш агрономнар һәм инженерлар, икъ-тисадчылар, хезмәтне саклау буенча җаваплы кешеләр, профком рәисләре катнашты.