АНТОН КОВАЛЕВ – РУСИЯ ЧЕМПИОНЫ

Түбән Новгород өлкәсе Дзержинск шәhәрендә ирекле стильдәге билбау көрәше буенча үткәрелгән Русия чемпионатында мәйдан тотарга спортчылар 25 регионнан җыелды. Башкортстанның җыелма командасы составында Чакмагыштагы балалар-үсмерләр спорт мәктәбендә тәрбияләнүче якташыбыз Антон Ковалевның уңышлы чыгышы hәммәбезне сөендерде. 60 килограммга кадәрге үлчәмдә беренчелек яулап, ул Русия чемпионы булды. Бу җиңү якташыбызга илебезнең җыелма командасы составында язны Бишкек шәhәрендә уздырылачак дөнья чемпионатында катнашу хокукы бирде.

Антонның тренеры – Рөстәм Зыякаевның тынгысыз хезмәте дә билгеләнми калмады: ул Русия Федерациясе Спорт hәм яшьләр сәясәте министрлыгының "Русия чемпионы тәрбияләгән өчен” Дипломы белән бүләкләнде. Антон Ковалевка hәм тренеры Рөстәм Зыякаевка исәнлек-иминлектә яңадан-яңа җиңүләр яулавын телибез.

Мөдәрис Гафаров,

муниципаль район хакимиятенең

 спорт hәм физик культура комитеты рәисе.